मुक्तपीठ टीम
सध्या भारतात कोरोनाची तिसरी लाट सुरू असल्याचे तज्ज्ञांचे मत आहे. या तिसऱ्या लाटेत चढ-उतार असतानाही तिसरी लाट पहिल्या आणि दुसऱ्या लाटेपेक्षा कमी धोकादायक असल्याचे सिद्ध झाले आहे. त्याचवेळी मॅक्स हेल्थकेअरने केलेल्या सर्वेक्षणात अनेक आकडे समोर आले आहेत. ते स्पष्ट करते की, सध्याची कोरोना लाट पहिल्या आणि दुसऱ्या लाटेपेक्षा कशी वेगळी आहे.
मॅक्स हेल्थकेअरने आपल्या अभ्यासाच्या आधारे सांगितले आहे की, गेल्या वर्षी एप्रिल ते मे या काळात चारपैकी तीन कोरोना संसर्गित लोकांना ऑक्सिजनची गरज होती. पहिल्या लाटेदरम्यान रुग्णालयात दाखल झालेल्यांपैकी ६३ टक्के रुग्णांना ऑक्सिजनचा आधार देण्यात आला, गेल्या वर्षी दुसऱ्या लाटेत ७४ टक्के रुग्णांना ऑक्सिजनची गरज होती.
इतकेच नाही तर पहिल्या आणि दुसऱ्या लाटेच्या तुलनेत यावेळी केवळ २३.४ टक्के रुग्णांना ऑक्सिजनच्या आधाराची गरज आहे. सध्याच्या लाटेत, कोरोनामुळे मरण पावलेल्यांपैकी ६० टक्के लोकांनी एकतर एकच डोस घेतला होता किंवा त्यांचे लसीकरण झालेले नाही. मृतांपैकी बहुतेकांचे वय ७० वर्षांपेक्षा जास्त होते आणि त्यापैकी अनेकांना मधुमेह, कर्करोग, मूत्रपिंड किंवा हृदयाशी संबंधित आजारांनी ग्रासले होते.
मॅक्स हेल्थकेअरचे ग्रुप मेडिकल डायरेक्टर संदीप बुद्धीराजा म्हणाले की, या अभ्यासातून दोन महत्त्वाचे मुद्दे लक्षात आले आहेत. एक म्हणजे या लाटेत एकूण रूग्णालयात दाखल होण्याचे प्रमाण खूपच कमी आहे. दुसरा मुद्दा असा आहे की, दुसऱ्या लाटे दरम्यान रुग्णालयात दाखल झालेल्या एकूण रुग्णांपैकी सुमारे ७० ते ८० टक्के रुग्णांना ऑक्सिजनचा आधार आवश्यक होता. तर या लाटेत एकूण भरतीपैकी केवळ २० ते ३० टक्के लोकांना ऑक्सिजनचा आधार लागतो.
यावेळीही बाधितांची संख्या तेवढीच आहे पण रुग्णालयात दाखल झालेल्यांची संख्या पहिल्या आणि दुसऱ्या लाटेपेक्षा खूपच कमी आहे. गेल्या वर्षीच्या तुलनेत यावेळी केवळ ४१५ रुग्ण रुग्णालयात दाखल होत आहेत. कोरोनाच्या पहिल्या लाटेत मृत्यूदर ७.२ टक्के होता, जो दुसऱ्या लाटेत १०.५ टक्के झाला. तर सध्याच्या लाटेत हा आकडा ६ टक्के नोंदवला गेला आहे. कोरोना लसीकरणामुळे मृतांची संख्या कमी झाली आहे.
Subscribe
