गुरुवारपासून मुंबईच्या श्री सिद्धिविनायक मंदिरात कसं मिळणार दर्शन? वाचा नियमावली...

मुक्तपीठ टीम

कोरोनाचा प्रभाव कमी झाल्यामुळे येत्या ७ तारखेपासून सिद्धिविनायक मंदिर भाविकांसाठी खुलं करण्यात येणार आहे. अशी माहिती श्री सिद्धिविनायक गणपती मंदिर ट्रस्टने दिली. मात्र, मंदिरात प्रवेश घ्यायचा असेल तर तुम्हाला क्यूआर कोड प्री-बुकिंग करणं अनिवार्य असेल.

अशी करा नोंदणी

श्री सिद्धिविनायक गणपती मंदिर ट्रस्टचे अध्यक्ष आदेश बांदेकर यांनी याबाबतची माहिती दिली आहे.
“भाविकांना ७ ऑक्टोबरपासून सिद्धिविनायक मंदिरात प्रवेश दिला जाईल.
मात्र, या प्रवेशासाठी भाविकांना श्री सिद्धिविनायक मंदिर ट्रस्टच्या अ‍ॅपवर क्यूआर कोड प्री-बुकिंग करणं अनिवार्य असेल.
त्याचसोबत, “दर तासाला फक्त २५० भाविकांनाच दर्शनासाठी क्यूआर कोड दिला जाईल”, असंही सांगण्यात आलं आहे.
६ ऑक्टोबर रोजी रात्री १२ वाजल्यापासून दर्शनासाठी क्यूआर कोड नोंदणी करता येईल.

ही आहे नियमावली

दर्शनासाठी येतांना कोरोना प्रतिबंधासाठी शासनाने वेळोवेळी दिलेल्या सर्व मार्गदर्शक सूचनांचे पालन करणे आवश्यक आहे .
१० वर्षाखालील मुले, ६५ वर्षावरील वृध्द तसेच गर्भवती महिलांनी शक्यतो दर्शनासाठी प्रवेश करणे टाळावे.
मंदिरात प्रवेश करतांना मास्कचा वापर करणे बंधनकारक राहील.
योग्य अंतर ठेवा (६ फुट-६ फुट)
मंदिर परिसरात ६-६ फुटावर स्टीकर बसविण्यात आले आहेत.
मंदिरात प्रवेश केल्यानंतर गर्दी करणे टाळावे. दर्शनासाठी येतांना सामान, बॅग आणू नये.
हार, फुले, नारळ, पूजेची सामग्री व प्रसाद घेऊन भाविकांना मंदिरात प्रवेश दिला जाणार नाही.