कोरोनाने मृत्यू झाल्यास मिळू शकतात पंतप्रधान विमा योजनेतून २ लाख

मुक्तपीठ टीम

देशात कोरोनाच्या दुसऱ्या लाटेने थैमान घातले असून बाधित रुग्णांचे रोजच मृत्यू होत आहेत. ही संख्या ही मोठी आहे. कुटुंबातील सदस्याच्या मृत्यूनंतर आर्थिकृष्ट्या संकटात आल्याने कुटुंबाचे हाल होत आहेत. काहींवर उपासमाराची वेळ आली आहे. अशा परिस्थितीत कोरोनामुळे एखाद्याचा मृत्यू झाल्यास पंतप्रधान जीवन ज्योती विमा योजना म्हणजेच पीएमजेजेबीवायच्या अंतर्गत कुटुंबातील सदस्याला २ लाख रुपये मिळू शकतात.

पैसे कोणाला मिळणार?

जर एखाद्या व्यक्तीने पंतप्रधान जीवन ज्योती विमा योजनेत गुंतवणूक केली असेल तर त्याच्या मृत्यूनंतर त्याच्या नॉमिनीला दोन लाख रुपये मिळतील.
६ वर्षांपूर्वी भारत सरकारने सुरू केलेली ही टर्म योजना आहे.
ती खरेदी करणार्‍याला वर्षाकाठी ३३० रुपये जमा करावे लागतात.
भूकंप, पूर किंवा इतर नैसर्गिक आपत्तींमध्ये मृत्यूला कवर करते.
आत्महत्या आणि हत्येसारख्या मृत्यूमध्येही एखाद्याला त्याअंतर्गत विमा संरक्षण मिळते.
जरी पंतप्रधान जीवन ज्योती योजना विकत घेतलेल्या व्यक्तीचा मृत्यू कोरोनामुळे झाला असला तरीही बँकेला त्याच्या नॉमिनीला दोन लाख रुपये द्यावे लागतील.
या विमा योजनेत कोणतीही व्यक्ती १८ ते ५० वर्षांच्या दरम्यान गुंतवणूक करू शकते.

पंतप्रधान जीवन ज्योती विमा योजनेच्या अटी व शर्ती

पीएमजेजेबीवाय योजना एलआयसी आणि इतर खाजगी जीवन विमा कंपन्यांद्वारे राबवली जाते
एखादी व्यक्ती पीएमजेजेबीवायशी केवळ विमा कंपनी आणि बँक खात्यासह जोडलेली असू शकते.
पीएमजेजेबीवायचा हक्क मिळविण्यासाठी, विमाधारकाचे नामनिर्देशित / उत्तराधिकारी यांनी ज्या शाखेत खाते आहे अशा बँकेच्या शाखेशी संपर्क साधावा.
विमा खरेदी झाल्यानंतर एखाद्या व्यक्तीच्या मृत्यू झाल्यास किमान ४५ दिवसांनी पीएमजेजेबीवाय मधील विमा संरक्षण हप्त्याचा दावा स्वीकारला जातो. परंतु जर एखाद्या व्यक्तीचा अपघातात मृत्यू झाला, तर ही अट लागू होत नाही.
जॉइंट बँक खातेदारांना या योजनेचा लाभ घ्यायचा असेल तर खाते धारकांना वार्षिक प्रीमियम भरावा लागेल.