मुक्तपीठ टीम
गुगल असो की फेसबूक हे ग्लोबल टेक जायंट जगभरात त्यांच्या क्षेत्राशी संबंधित काय चांगलं चाललंय त्यावर बारकाईनं लक्ष ठेऊन असतात. गुगलच्या यूट्युबच्या नजरेत आला तो सिमसिम हा भारतीय स्टार्टअप. सिमसिम हा भारतीय व्हिडीओ ई-कॉमर्स प्लॅटफॉर्म आहे. आता यूट्युब तो ताब्यात घेणार असल्यानं त्याच्या संस्थापकांच्या परिश्रमाचं चीज झालं आहे.
गुगलच्या ब्लॉगपोस्टनुसार, “आम्ही स्थानिक व्यवसायातून उत्पादने शोधण्यात आणि खरेदी करण्यात प्रेक्षकांना मदत करण्यासाठी आणखी एक पाऊल पुढे टाकत आहोत. आम्ही सिमसिम घेण्यासंदर्भात एक निश्चित करारावर स्वाक्षरी केली आहे. येत्या आठवड्यात व्यवहार पूर्ण होईल अशी अपेक्षा आहे.”
कंपनीने व्यवहाराची आर्थिक माहिती उघड केली नाही. सिमसिमच्या व्यवस्थापनात त्वरित बदल होणार नाहीत आणि अॅप स्वतंत्रपणे कार्य करत राहील, अशी माहिती देण्यात आहे. यू-ट्यूब दर्शकांना सिमसिम ऑफर दर्शविण्याच्या मार्गांवर कार्य करीत आहे. सिमसिमचे सहसंस्थापक अमित बागरिया, कुणाल सुरी आणि सौरभ वशिष्ठ यांच्या संयुक्त निवेदनानुसार, भारतभरातील यूजर्सना सहजपणे ऑनलाइन खरेदी करता यावी यासाठी सिमसिमची सुरुवात झाली.
यामध्ये लहान विक्रेते आणि ब्रॅन्ड यांचा समावेश केला आहे. ते सिमसिमच्या माध्यमातून आपली उत्पादने दाखवू आणि विकू शकतील. त्यामुळे जास्तीत जास्त लोक ऑनलाइन खरेदी करतील. ग्राहकांना नवीन उत्पादने शोधण्यात आणि तज्ज्ञांचा सल्ला मिळवण्यात मदत करण्यासाठी व्हिडीओ महत्त्वपूर्ण भूमिका बजावतात, सिमसिमची तीच खासियत आहे.
Subscribe
