मुक्तपीठ टीम
काश्मीरमधील फुटीरतावादी नेता यासिन मलिक याला आज दिल्लीतील एनआयए न्यायालयाने टेरर फंडिंग प्रकरणात दोषी ठरवले. यासिन मलिक UAPA अंतर्गत सर्व आरोपांमध्ये दोषी आढळला आहे. विशेष म्हणजे, यापूर्वी यासीन मलिकने आपण दहशतवादी कारवायांमध्ये सहभागी असल्याचे आणि त्याच्यावर लावण्यात आलेले सर्व आरोप खरे असल्याचे मान्य केले होते. यासिन मलिकला किती शिक्षा द्यायची यावर २५ मे रोजी निर्णय होणार आहे. यासीन मलिकच्या वतीने न्यायालयात प्रतिज्ञापत्रही दाखल करण्यात आले असून, त्यात त्याच्या आर्थिक स्थितीबाबत सांगण्यात आले असून, त्याची आर्थिक स्थिती पाहून त्याला दंड ठोठावण्यात यावा, असे म्हटले आहे.
यासीन मलिकाविरोधात कोणते आरोप?
- विशेष न्यायाधीश प्रवीण सिंग यांनी NIA अधिकाऱ्यांना मलिकला दंड ठोठावण्यासाठी त्याच्या आर्थिक स्थितीचे मूल्यांकन करण्याचे निर्देश दिले आणि शिक्षेवरील युक्तिवादासाठी खटल्याच्या सुनावणीसाठी २५ मे ही तारीख निश्चित केली.
- आपल्यावर लावण्यात आलेल्या आरोपांना आपला विरोध नाही, असे मलिक यांनी न्यायालयाला सांगितले होते.
- आरोपांमध्ये UAPA ची कलम १६ (दहशतवादी कृत्ये), १७ (दहशतवादी कृत्यांसाठी निधी गोळा करणे), १८ (दहशतवादी कृत्य करण्याचा कट) आणि २० (दहशतवादी टोळी किंवा संघटनेचा सदस्य असणे) आणि भारतीय दंड १२०-बी (गुन्हेगारी कट) आणि १२४-ए (देशद्रोह) यांचा समावेश आहे.
न्यायालयाने यापूर्वी फारुख अहमद दार उर्फ बिट्टा कराटे, शाबीर शाह, मसरत आलम, मोहम्मद युसुफ शाह, आफताब अहमद शाह, अल्ताफ अहमद शाह, नईम खान, मोहम्मद अकबर खांडे, राजा मेहराजुद्दीन कलवाल, बशीर अहमद भट, जहूर अहमद शाह वताली, फरार अहमद शाह, फरार अहमद शाह यांना अटक केली होती. शब्बीर अहमद शाह, अब्दुल रशीद शेख आणि नवलकिशोर कपूर यांच्यासह काश्मिरी फुटीरतावादी नेत्यांवर औपचारिकपणे आरोप निश्चित करण्यात आले.
Subscribe
