शी जिनपिंग परतले! जाहीर कार्यक्रमातील हजेरीनं अफवांना पूर्णविरामाचा प्रयत्न!!

मुक्तपीठ टीम

चीनचे राष्ट्राध्यक्ष शी जिनपिंग दहा दिवसांनी बीजिंगमध्ये दिसून आले आहेत. ते एका सरकारी कार्यक्रमात सहभागी होण्यासाठी आले असता सरकारी टीव्हीवर दिसले. अनेक दिवसांपर्यंत दिसून न आल्याने सोशल मीडियावर जिनपिंग यांना चीनच्या सैन्याने नजरकैदेत ठेवल्याच्या अफवा पसरू लागल्या होत्या. त्यामुळे जिनपिंग यांनी सरकारी कार्यक्रमात हजेरी लावत सर्व अफवांना फोल ठरवलं आहे.

एका सरकारी कार्यक्रमात दिसले जिनपिंग!!

पुढच्या महिन्यात चायना कम्युनिस्ट पार्टी म्हणजेच CPCची वार्षिक मीटिंग होत आहे.
त्यांच्या अनुपस्थितीमुळे अनेक कयास लावले जात होते.
शी जिनीपांग यांनी मंगळवारी चीनच्या कम्युनिस्ट पक्षाच्या प्रदर्शनाला भेट दिली आणि सरकारी टीव्हीवर दिसले.
चिनी राष्ट्रपतींसह या कार्यक्रमात पंतप्रधान ली किकियांग आणि पक्षातील काही नेतेही हजर होते.
याशिवाय चिनी सैन्याचे काही अधिकारीही येथे दिसून आले.
या कार्यक्रमात चीनच्या आर्थिक विकासावर चर्चा झाली.

समरकंदमधून परतल्यानंतर दिसले नव्हते जिनपिंग-

जिनपिंग १६ सप्टेंबरला उझबेकिस्तानच्या समरकंदमध्ये SCO समिटमध्ये सहभागी होण्यासाठी गेले होते.
ही दोन वर्षांनंतर त्यांची पहिली परदेशी भेट होती.
समरकंदमध्ये २ दिवस थांबल्यानंतर जिनपिंग बीजिंगला परतले आणि त्यानंतर ते कोणत्याही कार्यक्रमात दिसून आले नव्हते.
सोशल मीडियावर म्हटले जात होते की, चिनी सेना जिनपिंग यांच्यावर नाराज आहे आणि यामुळेच त्यांना हाऊस अरेस्ट करण्यात आले आहे.
तसेच, चीनमध्ये कोरोनाच्या काळात हा नियम आहे की, परदेशातून परतल्यानंतर कोणत्याही व्यक्तीला ७ दिवस क्वारंटाइन राहावे लागते.
सध्या, असा कोणताही नेता नाही जो जिनपिंग यांना थेट आव्हान देत असेल.
असे म्हटले जात आहे की, ते त्यांच्या मनाला वाटेल तोपर्यंत राष्ट्रपतिपदी राहू शकतात.