मुक्तपीठ टीम
जळगाव जिल्ह्यातील पाळधी बुद्रुक पाणीपुरवठा योजनेसाठी विद्यापीठाची जमीन जळगाव जिल्ह्यातील धरणगाव तालुक्यातील पाळधी या ग्रामपंचायतीसाठी पाणीपुरवठा योजनेसाठी जमिनीची गरज होती. जल जीवन मिशन अंतर्गत नवीन पाणीपुरवठा योजनेकरिता पाण्याची टाकी व फिल्टर प्लँट उभारण्यासाठी जागा आवश्यक होती. कवयित्री बहिणाबाई चौधरी उत्तर महाराष्ट्र विद्यापीठाच्या ताब्यात तेथे जमीन आहे. त्यातील २ एकर जमीन उपलब्ध करून देण्यात यावी, असे निर्देश उच्च व तंत्रशिक्षण मंत्री उदय सामंत यांनी दिले. पाणीपुरवठा व स्वच्छता मंत्री गुलाबराव पाटील यांनी यासंदर्भातील कार्यवाही जलदगतीने होण्यासाठी पाठपुरावा केला. त्यामुळे या गावचा पाणीप्रश्न सुटला आहे.
ग्रामपंचायत पाळधी बु. (ता. धरणगाव) (जिल्हा जळगाव) करिता जल जीवन मिशन अंतर्गत नवीन पाणीपुरवठा योजनेकरिता पाण्याची टाकी व फिल्टर प्लँट उभारण्याबाबत दूरदृष्य प्रणालीद्वारे बैठक पाणीपुरवठा मंत्री गुलाबराव पाटील यांच्या अध्यक्षतेखाली व उच्च व तंत्रशिक्षण मंत्री यांच्या उपस्थितीत आयोजित करण्यात आली होती. या बैठकीस जळगाव जिल्हाधिकारी अभिजित राऊत, श्री.वायूनंदन, सुभाष भुजबळ, शिवशंकर नाईक उपस्थित होते.
उच्च व तंत्रशिक्षण मंत्री उदय सामंत म्हणाले, ग्रामपंचायत पाळधी बु. (ता. धरणगाव) (जिल्हा जळगाव) करिता जल जीवन मिशन अंतर्गत नवीन पाणीपुरवठा योजनेकरिता पाण्याची टाकी व फिल्टर प्लँट उभारण्यासाठी विद्यापीठाच्या ताब्यातील २ एकर जमिन उपलब्ध करुन देण्यात येईल. गावातील लोकांना पिण्यासाठी पाणी उपलब्ध होण्यासाठी याठिकाणी पाण्याची टाकी उभी करण्यात येणार असून या योजनेमुळे विद्यापिठाला आणि गावाला पाणीपुरवठा केला जाणार आहे.यासाठी लागणारी दोन एकर जागा विद्यापीठाने उपलब्ध करुन द्यावी. ही जमिन विद्यापिठाच्या नावावर असणार आहे. जिल्हाधिकारी यांनी याबाबतचा प्रस्ताव तयार करुन तातडीने कुलगुरुंकडे पाठवावा. यामध्ये जमिनीचा सर्व्हे नंबर देवून दोन एकर जागेचा उल्लेख करण्यात यावा. विद्यापिठाने यावर तातडीने कार्यवाही करुन एनओसी उपलब्ध करुन द्यावी, असे निर्देशही श्री.सामंत यांनी दिले.
पाणीपुरवठा मंत्री गुलाबराव पाटील म्हणाले, येथील गावातील लोकांनी विद्यापिठाला जमिनी उपलब्ध करुन दिल्या आहे. नळ पाणी पुरवठा योजना सर्वांसाठी आहे. या योजनेमुळे येथील गावाला व विद्यापीठाला पाणी मिळणार आहे, असेही त्यांनी यावेळी सांगितले.
Subscribe
