मुक्तपीठ टीम
स्त्रियांना शिक्षणाची द्वारे खुली करुन देशात शैक्षणिक क्रांती करणारे महात्मा फुले यांना अभिप्रेत असणारे शिक्षक, विद्यार्थी व एकूण समाज निर्माण व्हावा, जसा शेतकरी शेतीची मशागत करतो व मग चांगलं पीक येतं, तसे शिक्षकांनी विद्यार्थ्यांच्या विचारांची मशागत करावी, विद्यार्थ्यांचे भवितव्य व पर्यायाने समाज व देश घडवावा असे मत माजी खासदार राजू शेट्टी यांनी पुणे येथे शिक्षकदिनी जगदीशब्द फाउंडेशन आयोजित भव्य पुरस्कार वितरण सोहळ्यात व्यक्त केले.
क्रांतीसुर्य महात्मा ज्योतिराव फुले यांचा स्मृतिदिन म्हणजेच शिक्षक दिनी जगदीशब्द फाउंडेशन व परिवर्तन सामाजिक संस्था यांच्या वतीने शिक्षक शिक्षिका व डॉक्टर, वकील, पत्रकार, संस्था यासह विविध क्षेत्रातील मान्यवरांना राज्यस्तरीय क्रांतीसुर्य व क्रांतीज्योती पुरस्कार वितरण सोहळा पुणे येथे माजी खासदार राजू शेट्टी यांच्या विशेष उपस्थितीत मोठ्या दिमाखात संपन्न झाला.
यावेळी प्रमुख पाहुणे म्हणून सामाजिक कार्यकर्त्या दिशा पिंकी शेख, पत्रकार श्रीरंग गायकवाड, भूमाता ब्रिगेडच्या तृप्ती देसाई, ज्येष्ठ विधीज्ञ विजय कुरले, साहित्यिक नारायण सुमंत, व्याख्याते जगदीश ओहोळ, परिवर्तनचे महादेव वाघमारे आदी मान्यवर उपस्थित होते.
या पुरस्कार वितरण सोहळ्यात राज्यातील सर्व जिल्ह्यातून पुरस्कारार्थी निवडण्यात आले होते. शैक्षणिक, सामाजिक, उद्योग, आरोग्य, पत्रकारिता अशा विविध क्षेत्रातील मान्यवरांना यावेळी पुरस्कार देऊन सन्मानित करण्यात आले. कार्यक्रमाच्या सुरुवातीला महात्मा फुले यांच्या जीवनावर आधारित ‘मी महात्मा फुले बोलतोय’ हा प्रयोग चिमुकल्या संकल्प गायकवाड यांने सादर केला. त्यास उपस्थितांनी जोरदार दाद दिली. यावेळी दिशा शेख, गायकवाड यांनी ही मनोगते व्यक्त केली.
कार्यक्रमाचे प्रास्ताविक जगदीश ओहोळ व सूत्रसंचालन जालिंदर राऊत यांनी केले तर आभार महादेव वाघमारे यांनी मानले.
Subscribe
