जिजाऊ माँसाहेब प्रेरणेचा अखंडीत स्त्रोत’

मुक्तपीठ टीम 

राजमाता जिजाऊ माँसाहेब यांना जयंतीनिमित्त मुख्यमंत्री उद्धव ठाकरे आणि उपमुख्यमंत्री अजित पवार यांनी आज विनम्र अभिवादन केले. जिजाऊ माँसाहेब या आपल्या सर्वांसाठी प्रेरणेचा अखंडीत स्त्रोत असल्याचे मुख्यमंत्री यांनी अभिवादन संदेशात म्हटले आहे. वर्षा निवासस्थानी मुख्यमंत्री ठाकरे यांनी राजमाता जिजाऊ माँसाहेब यांच्या प्रतिमेला पुष्पहार अर्पण करून जयंतीनिमित्त अभिवादन केले.

मुख्यमंत्री उद्धव ठाकरे यांनी आपल्या अभिवादन संदेशात म्हटले आहे की, “संकट काळात न डगमगता धैर्य आणि शौर्याने पुढे जाण्याची प्रेरणा म्हणजे राजमाता जिजाऊ माँसाहेब. जिजाऊ माँसाहेब यांनी छत्रपती शिवाजी महाराज, छत्रपती संभाजी महाराज यांना स्वाभिमान जपण्याचा आणि दुर्बल, वंचितांच्या रक्षणाचा मुलमंत्र दिला. रयतेचे राज्य स्थापन व्हावे यासाठी त्यांनी मुत्सद्दीपणा आणि धीरोदात्तपणे पावले टाकली. आजच्या आव्हानात्मक परिस्थितीतही जिजाऊ माँसाहेब यांचा करारी बाणा आणि धडाडी प्रेरणादायी अशीच आहे. प्रेरणेचा अखंडीत स्त्रोत, वंदनीय राजमाता जिजाऊ माँसाहेब यांना कोटी कोटी प्रणाम आणि जयंतीनिमित्त विनम्र अभिवादन.”

“जिजाऊ माँसाहेबांच्या स्वाभिमानी विचारांवरच महाराष्ट्राची वाटचाल” – उपमुख्यमंत्री अजित पवार

“स्वराज्यजननी, राजमाता जिजाऊ माँसाहेबांच्या प्रेरणेतूनच छत्रपती शिवाजी महाराजांनी स्वराज्याची स्थापना केली. माँसाहेबांनी महाराष्ट्राला स्वाभिमान शिकवला, राष्ट्रासाठी त्यागाची आणि जगण्याची प्रेरणा दिली. कुठल्याही संकटावर मात करण्याचे बळ दिले. जिजाऊ माँसाहेबांच्या स्वाभिमानी विचारांवरच आजही महाराष्ट्राची वाटचाल सुरु आहे. प्रत्येक आव्हानावर मात करण्याचे बळ माँसाहेबांच्या संस्कारी विचारातच आहे,” अशा शब्दात राजमाता जिजाऊ माँसाहेबांचे स्मरण करुन उपमुख्यमंत्री अजित पवार यांनी त्यांना जयंती निमित्त अभिवादन केले आहे.

उपमुख्यमंत्री अजित पवार पुढे म्हणाले, “शेकडो वर्षांच्या गुलमागिरीच्या जोखडातून मुक्ततेची वाट राजमाता माँ जिजाऊंनी महाराष्ट्राला दाखविली. त्यांच्या प्रेरणेतूनच छत्रपती शिवाजी महाराजांनी महाराष्ट्राच्या भूमीत शेतकऱ्यांचे-रयतेचे स्वराज्य स्थापन केले. माँसाहेबांच्या ज्या विचारांनी छत्रपती शिवाजी महाराजांना घडवले, हजारो मावळ्यांना प्रेरणा दिली, त्याच विचारांवर आजही महाराष्ट्राची वाटचाल सुरु आहे. जिजाऊ माँसाहेबांचे विचार, संस्कार आपल्याला कायमच लढण्याची प्रेरणा आणि बळ देत राहतील. राजमाता जिजाऊ माँसाहेबांनी मोठ्या शौर्याने, ध्यैर्याने, संयमाने स्वराज्याचे स्वप्न साकार केले. शेती, शिक्षण, सहकार, सामाजिक सुधारणा अशा अनेक क्षेत्रात आपला महाराष्ट्र आज आघाडीवर दिसतो, याचे मूळ जिजाऊ माँसाहेबांनी रुजविलेल्या स्वाभिमानाच्या विचारात आणि राष्ट्रासाठी त्यागाच्या संस्कारात आहे.”