मनसे अध्यक्ष राज ठाकरे आणि आईंना कोरोना, सौम्य लक्षणांमुळे घरीच उपचार

मुक्तपीठ टीम

मनसे अध्यक्ष राज ठाकरे यांना कोरोनाची लागण झाली आहे. प्रकृती बिघडल्याने त्यांचे मुंबईतील भांडुप आणि पुणे येथील मनसेचे मेळावे रद्द करण्यात आले होते. कोरोनाची लक्षणे जाणवू लागल्यामुळे त्यांची चाचणी करण्यात आली. या चाचणीनंतर त्यांचा अहवाल पॉझिटिव्ह आला आहे. मात्र, कोरोनाची लक्षणे ही सौम्य आहेत. राज ठाकरे यांच्या आईंनादेखील कोरोनची लागण झाली आहे. सध्या दोघांवरही ठाकरे यांच्या कृष्णकुंज या राहत्या घरी उपचार सुरु आहेत.

आगामी मनपा निवडणुकीच्या पार्श्वभूमीवर मनसे सक्रिय झाली आहे. स्वत: मनसे अध्यक्ष राज ठाकरे यांनी नाशिक, पुणे दौरा करून पक्षातील कार्यकर्त्यांची बैठक घेतली. २३ ऑक्टोबरला मनसेचा मुंबईत आणि २४ ऑक्टोबरला पुण्यात मेळावा होणार होता मात्र तो अचानक रद्द करण्यात आला आहे. मनसेच्या ट्विटर हँडलवरून ही माहिती देण्यात आली आहे. राज ठाकरे यांची तब्येत ठिक नसल्याने हा मेळावा पुढे ढकलण्यात आल्याचं सांगितलं जात होतं. आता मात्र राज ठाकरे आणि त्यांच्या आईंना कोरोनाची लागण झाल्याचे निदान झाले असल्याचे सांगण्यात आले आहे.

मनसेच्या ट्विटर हँडलवरून दिली माहिती

मनसेच्या ट्विटर हँडलवरून मेळावा रद्द करण्यात आल्याची माहिती देण्यात आली आहे.
महाराष्ट्र नवनिर्माण सेनेचा शनिवार २३ ऑक्टोबर रोजी मुंबईत, तर २४ ऑक्टोबर रोजी पुणे येथे होणारा शाखाअध्यक्षांचा मेळावा काही अपरिहार्य कारणांमुळे पुढे ढकलण्यात आला आहे.
पुढील मेळाव्याची तारीख, वेळ व ठिकाण लवकरच जाहीर करण्यात येईल, याची सर्वांनी नोंद घ्यावी, असं मनसेच्या ट्विटमध्ये म्हटलं आहे.
मात्र, मेळावा रद्द करण्याचं कारण देण्यात आलेलं नाही.
मेळाव्याची तयारी पूर्ण झालेली असतानाच ऐनवेळी मेळावा रद्द करण्यात आला आहे.

राज यांची तब्येत बिघडली

२३ ऑक्टोबर रोजी भांडूप येथे हा मेळावा होणार होता.
या मेळावाच्या आयोजनाबाबत आज मनसे मुख्यालय राजगड येथे बैठक फार पडली होती.
यावेळी कोरोनाचे सर्व नियम पाळून या मेळाव्याचे आयोजन करण्यात येणार असल्याची माहिती मनसे नेते नितीन सरदेसाई यांनी दिली होती.
या मेळाव्यात राज ठाकरे काय बोलणार याकडे सर्वांचं लक्ष लागलं होतं.
या मेळाव्यात राज ठाकरे यांच्या रडारवर कोण असेल याबाबतही सर्वांची उत्सुकता लागली होती.
दरम्यान, राज ठाकरे यांची प्रकृती ठिक नसल्याचं कळतं.
त्यामुळेच उद्या आणि परवा होणारे मेळावे रद्द करण्यात आले आहेत.
संध्याकाळी उशिरा मनसेच्या गोटातून राज ठाकरे आणि त्यांच्या आईंना कोरोनाची लागण झाल्याचे सांगण्यात आले.