नवी मुंबईत लवकरच मेट्रो धावणार, २८ ऑगस्टपासून ऑसिलेशन चाचणी

मुक्तपीठ टीम

सिडको महामंडळाच्या नवी मुंबई मेट्रो प्रकल्पातील बेलापूर ते पेंधर या मार्ग क्र. एकवर मेट्रोची ऑसिलेशन चाचणी घेण्यात येणार आहे. रिसर्च डिझाईन ॲन्ड स्टॅंडर्ड ऑर्गनायझेशन म्हणजेच आरएसडीओकडून २८ ऑगस्ट २०२१ पासून ही चाचणी घेण्यात येईल. पेंधर स्थानक ते सेंट्रल पार्क स्थानकादरम्यान मेट्रोची ऑसिलेशन चाचणी आणि इमर्जन्सी ब्रेक डिस्टन्स चाचणी घेण्यात येणार आहे. या मार्गावर प्रत्यक्ष प्रवासी वाहतूक सुरू करण्याच्या दृष्टीकोनातून ऑसिलेशन चाचणी महत्त्वाची ठरणार आहे. या चाचण्यांमुळे मेट्रोचा मार्ग मोकळा होणार आहे.

ऑसिलेशन चाचणी हा महत्त्वाचा टप्पा – डॉ. संजय मुखर्जी

प्रत्यक्ष प्रवासी वाहतूक सुरू करण्यापूर्वीचा ऑसिलेशन चाचणी हा महत्त्वाचा टप्पा आहे.
ऑसिलेशन चाचणी पार पडल्यानंतर लवकरच मार्ग क्र. १ वर दोन टप्प्यांत प्रवासी वाहतूक सुरू करण्यात येणार आहे.
यामुळे नवी मुंबईकरांचे मेट्रो प्रवासाचे स्वप्न लवकरच पूर्ण होणार आहे.

नवी मुंबईतील वाहतूक व्यवस्थेच्या सक्षमीकरणासाठी मेट्रो

नवी मुंबईतील सार्वजनिक वाहतूक व्यवस्था अधिक सक्षम करण्याच्या आणि नवी मुंबईतील नोड परस्परांना अधिक सुलभरीत्या जोडले जावेत या उद्देशाने सिडकोतर्फे नवी मुंबई मेट्रो प्रकल्पांतर्गत एकूण ४ उन्नत मार्ग (एलिव्हेटेड कॉरिडॉर) विकसित करण्यात येत आहेत.
यांपैकी ११.१० कि.मी. लांबीच्या, तळोजा येथे आगार (डेपो) असलेल्या मार्ग क्र. १ वर मेट्रोची यशस्वी चाचणी घेण्यात आली होती.
या मार्गावरील उर्वरित कामे पूर्ण करण्याकरिता सिडकोकडून महामेट्रोची नियुक्ती करण्यात आली आहे.
मुख्य व्हायडक्ट, आगार प्रवेश व्हायडक्ट, आगार व कार्यशाळा उभारणीची कामे पूर्ण झाली आहेत.
तर स्थानकांची उभारणी, लिफ्ट, उद्ववाहन, फर्निचर आणि प्रणाली ही कामे प्रगतीपथावर आहेत.

भारत सरकारच्या रेल्वे मंत्रालयांतर्गत असणाऱ्या आरएसडीओवर देशातील विविध रेल्वे प्रणालींमध्ये प्रमाणीकरण आणि समन्वय साधण्याची जबाबदारी असते. आरएसडीओकडून सदर मार्ग क्र. १ वरील पेंधर स्थानक ते सेंट्रल पार्क स्थानका दरम्यानच्या ५.१४ कि.मी. च्या अंतरावर मेट्रोची ऑसिलेशन चाचणी आणि इमर्जन्सी ब्रेक डिस्टन्स चाचणी २८ ऑगस्ट २०२१ पासून घेण्यात येणार आहे. प्रत्यक्ष प्रवासी वाहतूक सुरू करण्याच्या दृष्टीने चाचपणी म्हणून ऑसिलेशन चाचणी अत्यंत महत्त्वाची ठरते. ऑसिलेशन चाचणी पार पडल्यानंतर लवकरच मार्ग क्र. १ वर पहिल्या टप्प्यात स्थानक क्र. ७ ते ११ आणि दुसऱ्या टप्प्यात स्थानक क्र. १ ते ११ दरम्यान प्रवासी वाहतूक सुरू करण्यात येणार आहे.