लोकसभेच्या अध्यक्षांनी मागितली खासदार राणांच्या अटकेची माहिती

मुक्तपीठ टीम

हनुमान चालिसा वादानंतर अटक करण्यात आलेल्या अपक्ष खासदार नवनीत राणा प्रकरणी लोकसभा अध्यक्ष ओम बिर्ला यांनी महाराष्ट्र सरकारकडून तपशील मागवला आहे. ओम बिर्ला यांनी २४ तासांत नवनीत राणाच्या अटकेची माहिती मागवली आहे. यापूर्वी राणाने ओम बिर्ला यांना पत्र लिहून पोलिसांकडून अमानुष वागणूक दिल्याचा आरोप केला होता, तसेच त्यांची अटक बेकायदेशीर असल्याचे म्हटले होते. नवनीत राणा यांनी त्यांच्या पत्रात आरोप केला होता की, ते अनुसूचित जातीचे असल्याने त्यांना तुरुंगात पाणी दिले जात नाही किंवा शौचालय वापरण्याची परवानगी दिली जात नाही. दरम्यान, राणांना उच्च न्यायालयानंतर सत्र न्यायालयातूनही दिलासा मिळालेला नाही.

उच्च न्यायालयानंतर सत्र न्यायालयाचाही दिलासा नाही!

• देशद्रोह आणि शत्रुत्वाला प्रोत्साहन देण्याच्या आरोपाखाली तुरुंगात असलेल्या अपक्ष खासदार नवनीत राणा आणि त्यांचे पती आमदार रवी राणा यांनी जामिनासाठी सत्र न्यायालयात धाव घेतली.
• त्यांच्या जामीन अर्जावर सुनावणीनंतर सत्र न्यायालयाने दिलासा देण्यास नकार दिला.
• यापूर्वी नवनीत राणा आणि त्यांचे आमदार पती रवी राणा यांनी मुंबई उच्च न्यायालयात जामीन अर्ज दाखल केला होता.
• उच्च न्यायालयाने त्यांच्याविरुद्ध एफआयआर नोंदवण्याची याचिका फेटाळून लावली होती.
• सार्वजनिक ठिकाणी हनुमान चालीसा केल्याबद्दल नवनीत राणा यांना फटकारले होते.
• सार्वजनिक जीवनात ज्यांची जबाबदारी असते, त्यांच्यावर अधिक जबाबदारी असते, असे न्यायालयाने म्हटले होते.

राणांवर देशद्रोहाचाही आरोप

वास्तविक, हनुमान चालिसाच्या पठणावरून वाद निर्माण झाल्यानंतर शनिवारी राणा दाम्पत्याला अटक करण्यात आली. राणा दाम्पत्याविरुद्ध आयपीसीच्या कलम १५अ आणि ३५३ तसेच मुंबई पोलीस कायद्याच्या कलम १३५ अंतर्गत एफआयआर दाखल करण्यात आला आहे. त्यांच्यावर सर्वात मोठे कलम १२४अ म्हणजेच देशद्रोहाचे कलमही लागू करण्यात आले आहे.