जेव्हा एका भारतीयासाठी अफगाणिस्तानने अर्धी एअरफोर्स केली होती तैनात!

मुक्तपीठ टीम

तालीबानने अफगाणिस्तानचा कब्जा घेतल्यानंतर आता तो देश म्हणजे आपला शत्रू असंच अनेकांचं मत झालं आहे. तालिबानी सत्ताधारी पुढे कशी वागते त्यावर भारताशी असलेले त्यांचे संबंध अवलंबून असतील. मात्र, आपल्यासाठी आक्रमक अब्दालीसारखे अपवाद वगळता अफगाणिस्तानशी मैत्रीचं नातं जास्त आहे.

अशीच एक आठवण एका भारतीयाच्या सुरक्षेसाठी अफगाणिस्ताननं आपली अर्धी एअर फोर्स तैनात केली होती त्याची!

जगाला मोहात टाकणाऱ्या बॉलीवूडच्या अनेक आठवणी

अफगाणिस्तानशी जोडलेल्या आहेत. अनेक चित्रपटांचे शुटिंग तिथे पार पडले आहे. त्यातीलच एक लोकप्रिय चित्रपट म्हणजे ‘खुदा गवा’. मझार-ए-शरीफ येथे बुज्काशी (घोड्यांवर खेळला जाणारा खेळ) चा एक सीन शूट करण्यात आला. जेव्हा त्या दृश्याचं शुटिंग सुरु होते, तेव्हा अफगाणिस्तानची अर्धी एअर फोर्स अमिताभ बच्चन आणि त्यांच्या संपुर्ण टीमच्या सुरक्षेत तैनात करण्यात आली होती. त्याचं सर्वात मोठं कारण अफगाणिस्तानचे तत्कालीन राष्ट्राध्यक्ष नजीबुल्लाह अहमदझाई बॉलिवूडचे मोठे चाहते होते आणि अर्थातच अमिताभ बच्चन यांचेही!

संपूर्ण शुटिंग क्रू शाही इतमामात…

अफगाणिस्तानच्या भारत मैत्रीची या आठवणीला आताच्या घटनाक्रमामुळे उजाळा मिळाला.
पण मुळात २०१३ मध्ये बिग बींनी हा संपूर्ण अनुभव फेसबुक पोस्टद्वारे शेअर केला.
‘सोव्हिएतने देश सोडला आणि हिंदी चित्रपटसृष्टीचे मोठे चाहते असलेल्या नजीबुल्ला अहमदझाई हे अध्यक्ष झाले.
त्याचवेळी अमिताभ बच्चन यांची प्रमुख भूमिका असलेल्या खुदा गवाहचे शुटिंग अफगाणिस्तानात करण्याचे ठरले.
त्यासाठी अमिताभ बच्चन यांच्यासह शुटिंग क्रू तिथं गेला.
त्यांच्या संपुर्ण टीमला शाही वागणुक मिळाली.

व्हीव्हीआयपी पाहुण्यांसारखी सरबराई…सुपर सुरक्षा!

त्यांना मजार-ए-शरीफ येथे व्हीव्हीआयपी पाहुणे मानले गेले आणि विमानांसह सशस्त्र एस्कॉर्ट्स मिळाले.
‘ही एक विस्मरणीय ट्रिप होती’ असे अमिताभ बच्चन यांनी सांगितले.
शुटिंग दरम्यान आणि इतर वेळी सुरक्षेची समस्या होती. पण सशस्त्र सैनिक रस्त्यावर सर्वत्र उपस्थित होते.
‘इतके असुनही ती माझ्या आयुष्यातील सर्वात विस्मरणीय सहल होती.’ असे ते म्हणाले.
डॅनी, बिलू, मुकुल आणि अमिताभ बच्चन यांनी हेलिकॉप्टरने, इतर ५ हेलिकॉप्टरसह प्रवास केला.
पर्वतांचे हवाई दृश्य अप्रतिम होते, असे त्यांनी सांगितले.