‘हर हर महादेव’ प्रेक्षक मारहाण प्रकरण: राष्ट्रवादी काँग्रेसचे आमदार जितेंद्र आव्हाडांना अटक

मुक्तपीठ टीम

आक्षेपार्ह प्रसंग असलेल्या ‘हर हर महादेव’ चित्रपटाला विरोध करणे राष्ट्रवादी काँग्रेसचे नेते जितेंद्र आव्हाड यांना भोवलं आहे. ठाण्यातील चित्रपटगृहात त्या चित्रपटाचा शो राष्ट्रवादीने बंद पाडताना काही प्रेक्षकांना मारहाण, धक्काबुक्की केल्याचा आरोप ठेवत राष्ट्रवादी काँग्रेसचे आमदार जितेंद्र आव्हाड यांना अटक करण्यात आली आहे.

छत्रपती शिवाजी महाराजांच्या जीवनावर आधारित चित्रपटांमध्ये इतिहासाचे विद्रुपीकरण करण्यात आला आहे. त्यामुळे शिवप्रेमींकडून राज्यभर संताप व्यक्त करण्यात येत आहे. ठाण्याच्या विवियाना मॉलमध्ये राष्ट्रवादीने प्रेक्षकांना सिनेमागृहात बाहेर जाण्यास भाग पाडले. त्यानंतरही सिनेमागृहात बसून असलेल्या प्रेक्षकांना राष्ट्रवादीच्या कार्यकर्त्यांनी हुसकावून लावले. त्यावेळी एका प्रेक्षकाला मारहाणही करण्यात आली. त्याच प्रकरणामध्ये आमदार जितेंद्र आव्हाड यांच्यासहीत माजी खासदार आनंद परांजपे यांना पोलिसांनी अटक केली आहे.

भाजपाकडून अटकेचे स्वागत!

राष्ट्रवादी काँग्रेसचे आमदार जितेंद्र आव्हाड यांच्या अटकेचे भाजपा आमदार अतुल भातखळकर यांनी स्वागत केलं आहे. अत्यंत योग्य आणि स्वागतार्ह कारवाई आहे, असं त्यांनी मत व्यक्त केलं आहे. राज्यात कोणीही कायदा हातात घेऊ शकत नाही, कायद्याप्रमाणे वागावं लागेल हे आव्हाडांनी लक्षात ठेवावं अशी सल्लावजा सूचनाही त्यांनी केली.

सरकार छत्रपती शिवाजी महाराजांच्या बाजूचे नाही!

राष्ट्रवादी काँग्रेसचे प्रदेशाध्यक्ष जयंत पाटील यांनी आव्हाडांच्या अटकेनंतर संताप व्यक्त केला आहे. हे सरकार छत्रपती शिवाजी महाराजांच्या बाजूने आहे, असे दिसत नाही. सरकारने सिनेमा तयार करताना यामध्ये इतिहासाचे विद्रुपीकरण करणाऱ्यांना जाब विचारण्याऐवजी निषेध करणाऱ्यांनाच अटक केली आहे. सगळीकडे लोकांच्या मनात या चित्रपटातील इतिहासाच्या विद्रुपीकरणाबद्दल संताप आहे. जितेंद्र आव्हाडांनी खरंतर गुन्हा केलेलाच नाही. तरीही सरकारने चिडून आता जितेंद्र आव्हाडांवर राग काढायला सुरुवात केलेली आहे, असा आरोपही जयंत पाटील यांनी राज्य सरकारवर केला आहे.