मुक्तपीठ टीम
ड्रीम मॉल आगीच्या दुर्घटनेनंतर आज मुंबई येथील प्रभादेवी परिसरातील गॅमन हाऊस इमारतीमधील गोदामाला भीषण आग लागली आहे. आगीची माहिती मिळताच अग्निशमन दलाच्या १५ गाड्या घटनास्थळी दाखल झाल्या आहेत. तर दुसरीकडे पुण्याच्या कॅम्प परिसरातील फॅशन स्ट्रीट मार्केटमध्ये मध्यरात्री आग लागल्याची घटना घडली आहे. या भागात मोठ्या प्रमाणात कापडाची दुकान आणि गोदामे असल्याने आग अधिक पसरण्याची भिती व्यक्त केली जात होती. मात्र आगीवर नियंत्रण आणण्यात अग्निशमन दलाला यश आले आहे. मात्र, मुंबईतील प्रभादेवी येथील आगीला विझवण्याचे शर्थीचे प्रयत्न अग्निशमन दलाकडून सुरू आहेत.
मुंबईच्या प्रभादेवीमध्ये लागलेली ही आग तळघरात लागल्याने आगीवर नियंत्रण आणणे अग्निशमन दलाला कठिण जात आहे. त्यामुळे आग विझवणे हे अग्निशमन दलासमोरील मोठे आव्हान असणार आहे. मिळालेल्या माहितीनुसार, सदर गोदामाला पहाटे ५ वाजता आग लागल्याचे सांगण्यात येत आहे. सिक्योरिटी गार्डने आग लागल्याचे पाहाताच तात्काळ अग्निशमन दलाला घटनेची माहिती दिली. तसेच हे इलेक्ट्रिक वायरचे हे गोदाम असल्याचे सांगितले जात आहे. सुदैवाने येथे कोणीतीही जीवित हानी झाली नसली तरी मोठ्या प्रमाणात नुकसान झाले आहे.
फॅशन स्ट्रीट मार्केट जळून खाक
पुण्यातील महात्मा गांधी रोडवर फॅशन स्ट्रीट मार्केट आहे. तेथे शुक्रवारी रात्री साडेनऊ वाजण्याच्या सुमारास आग लागली. आग लागल्यानंतर माहिती मिळताच अग्निशमन दलाच्या ५० जवानांसह १६ गाड्या घटनास्थळी दाखल झाल्या. त्याआधीच आग फॅशन स्ट्रीटवरील शेकडो दुकानांमध्ये पसरली होती. आगीच्या भयकारी ज्वालांनी परिसरात भीतीचे वातावरण निर्माण केले होते. तरीही साडेतीन तासांच्या अथक झुंजीनंतर मध्यरात्री १ वाजता आग विझवण्यात अग्निशमन दलाच्या जवानांना यश मिळालं. या आगीत फॅशन स्ट्रीट मार्केटमधील ४४८ दुकाने जळून खाक झाली.
आगीचे कारण अस्पष्ट
या दोन्ही ठिकाणी आग कशामुळे लागली याचे कारण अद्याप अस्पष्ट आहे.
वरळी आगीच्या ठिकाणाला महापौरांची भेट
प्रभादेवी येथे आग लागलेल्या गॅमन हाऊसला महापोर किशोरी पेडणेकर यांनी भेट दिली. तेथे त्यांनी परिस्थितीचा आढावा घेतला. आगीशी अथक झुंज देणारे अग्निशमन दलाचे अधिकारी, स्थानिक मुंबई पोलीस अधिकारी व कर्मचारी यांच्याशी चर्चा करून माहिती घेतली. अग्निशमन पथकाचे कौतुकही केले.
Subscribe
