सरकारला जे जमलं नाही ते गावकऱ्यांनी करून दाखवलं, स्वत: बांधला नदीवर पूल

सरकार करेल, कुणी तरी येईल आणि आपलं काम करेल, असं काही न करता गावकरी एकवटले आणि त्यांनी नदीवर स्वत:च पूल बांधला. ही प्रेरणादायी चांगली बातमी यवतमाळच्या पळशी आणि नांदेडच्या मनुला गावातील आहे. पळशी गाव यवतमाळ जिल्ह्यातील उमरखेडमध्ये तर मनुला नांदेडमध्ये आहे. तिथं पैनगंगा नदी वर पूल नव्हता. नदी ओलांडताना गावकऱ्यांना अनेक अडचणींचा सामना करावा लागत असे. विशेषत: दरवर्षी पावसाळ्यात ही अडचण जास्त होत होती. तिथल्या निवडून आलेले लोकप्रतिनिधी आणि अधिकारी वारंवार मागणी करुनही ते दुर्लक्ष करत होते. शेवटी पळशी आणि मनुलाच्या गावकऱ्यांनी स्वखर्चाने हा पूल ९ दिवसात बांधला.