लवकरच रिझर्व्हेशनशिवायही लांबचा प्रवास, रेल्वेकडून सुरक्षित प्रवासासाठी तयारी

मध्य रेल्वेने मुंबई, भुसावळ, नागपूर, पुणे आणि सोलापूर या पाचही विभागांना प्रवाशांना रिर्झव्हेशन नसले तरी तिकिटे देण्याची तयारी सुरू करण्यास सांगितले आहे. सध्या, विशेष गाड्या चालवल्या जात आहेत आणि केवळ रिर्झव्हेशन केलेल्या प्रवाशांनाच रेल्वे स्थानकात प्रवेश आणि ट्रेनमधून प्रवास करण्यास परवानगी आहे. आता भारतीय रेल्वे अतिरिक्त विशेष गाड्या चालवण्याची योजना आखत आहे. अतिरिक्त विशेष रेल्वेगाड्यांचा तपशील आणि वेळापत्रक अद्याप ठरलेले नाही. रेल्वेने अधिकाऱ्यांना असे सांगितले आहे की ते रिर्झरव्हेशन नसलेल्या प्रवाशांना तिकिटांचे विविध प्रकार उपलब्ध करुन देतील. जेणेकरून मानवी हस्तक्षेप टाळता येईल, असे भुसावळ रेल्वे विभागातील एका वरिष्ठ अधिकाऱ्याने सांगितले.