मुक्तपीठ टीम
कोरोनाच्या वाढत्या प्रादुर्भावामुळे महाराष्ट्रात आज रात्री ८ पासून ते १ मे सकाळी ७ वाजल्यापर्यंत कडक निर्बंध लादण्यात आले आहेत. यामध्ये संचारबंदीचा देखील समावेश आहे. याच पार्श्वभूमीवर आता राज्य सरकारने सर्व विद्यापीठांच्या परीक्षासंदर्भात मोठा निर्णय जाहीर केला आहे. आता राज्यातील १३ अकृषी विद्यापीठांमधीव कोणत्याही वर्षाच्या परीक्षा या ऑनलाईन पद्धतीने घेतल्या जातील, असं राज्याचे उच्च व तंत्रशिक्षण मंत्री उदय सामंत यांनी जाहीर केलं आहे.
“कोरोनाच्या परिस्थितीमुळे आणि नव्या निर्बंधांमुळे विद्यार्थ्यांना घराबाहेर पडणं कठीण झालं आहे. त्यामुळेच आम्ही सर्वानुमते निर्णय घेतलाय की महाराष्ट्रातल्या सर्व १३ अकृषी विद्यापीठांमध्ये उरलेल्या सर्व परीक्षा ऑनलाईन पद्धतीने घेतल्या जातील. या परीक्षा घेताना जर विद्यार्थ्यांना काही तांत्रिक अडचणी निर्माण होणार असतील, तर त्याची पूर्तता करण्याच्या सूचना आणि विनंती मी सर्व १३ विद्यापीठांच्या कुलगुरुंना केली आहे. या परीक्षांमधून कोणतेही विद्यार्थी वंचित राहणार नाहीत, याची दक्षता या विद्यापीठांनी घेतली पाहिजे”, अशी माहिती उदय सामंत यांनी पत्रकार परिषदेत दिली.
सामंत म्हणाले की, एनसीसी व एनएसएसच्या प्रमुखांशी बोलणार आहे. हे विद्यार्थी लसीकरण मोहिमेत स्वयंसेवक म्हणून सहभागी होतील. राज्याच्या कोरोना टास्क फोर्सचे संजय ओक यांनी तसं आवाहन केले होते. त्यांच्याशीही मी बोलणार आहे, असं सामंत म्हणाले.
Subscribe
