मुक्तपीठ टीम
सध्या व्हायरल होणाऱ्या बातम्यांमुळे अनेकवेळा घोळ होतो. लोक त्यावर विश्वासही ठेवतात. त्यामुळे त्याची पडताळणी करणे आवश्यक आहे. अशीच एक घटना नुकतीच घडली. टीव्ही क्षेत्रातील जेष्ठ अभिनेत्री वीणा कपूर यांची हत्या झाल्याची एक धक्कादायक बातमी काही दिवसांपूर्वीच समोर आली होती. त्यांच्या मुलानेच त्यांची हत्या केल्याचे म्हटले जात होते. प्रॉपर्टीसाठी मुलाने हे पाऊल उचलल्याचं सांगण्यात येत होते. परंतु, अभिनेत्री वीणा कपूर यांनी स्वत: याबाबत मुंबईतील दिंडोशी पोलीस ठाण्यात तक्रार दाखल करून आपण जिवंत असल्याचा दावा केला आहे.
वीणा कपूर यांच्या हत्येमागील गूढ काय आहे? जाणून घ्या
- ज्यावेळी वीणा कपूर यांनी स्वत: पोलिसांना तक्रार केली त्यावेळी सर्वांना आश्चर्य वाटले.
- ही हत्या टीव्ही अभिनेत्री वीणा कपूरची नसून मुंबईच्या जुहू भागात वीणा कपूर असे नाव असणाऱ्या एका मृत महिलेची आहे.
- या मृत महिलेच्या मुलाचे नाव सचिन कपूर आहे आणि त्याने त्याची आई वीणा कपूरची हत्या केली आहे.
- दोन्ही महिलांच्या एकाच नावामुळे लोकांमध्ये संभ्रम निर्माण झाला आणि ते अभिनेत्री वीणा कपूरला मृत समजू लागले.
- अशा परिस्थितीत सोशल मीडियावर लोकांनी अभिनेत्रीला श्रद्धांजली वाहण्यास सुरुवात केली. एवढेच नाही तर त्यांच्या मुलालाही ट्रोल करण्यात आले.
- आता अभिनेत्री वीणा कपूरच्या तक्रारीवरून पोलिसांनी अनोळखी लोकांविरोधात तक्रार नोंदवली असून या प्रकरणाचा तपास सुरू केला आहे.
खोट्या बातम्यांमुळे अभिनेत्री वीणा कपूर दुखावल्या!
आपण जिवंत असल्याची तक्रार अभिनेत्री वीणा कपूर यांनी पोलिसांकडे नोंदवली असून तिच्या मृत्यूची खोटी बातमी सोशल मीडियावर पसरवली जात आहे. सोशल मीडियावर तिला श्रद्धांजली वाहताना लोक त्यांच्या मुलाचा अपमान करत आहेत, त्यामुळे त्या दुखावल्या आहेत, असे त्यांनी सांगितले.
अभिनेत्री वीणा कपूरने माध्यमांशी संवाद साधताना सांगितले की, “मी अस्वस्थ आहे. माझा फोटो व्हायरल झाला असून लोक मला श्रद्धांजली वाहत आहेत. मला लोकांचे फोन येत आहेत आणि मी माझ्या कामावर लक्ष केंद्रित करू शकत नाही. मला सर्वांना सांगायचे आहे की माझ्या मुलाने मला मारले नाही. माझ्या मृत्यूची चुकीची बातमी पसरवली गेली. या खोट्या अफवेमुळे मला काम मिळणेही बंद झाले आहे. ज्या महिलेची हत्या करण्यात आली तिचे नाव वीणा कपूर आहे, हे लक्षात घ्यावे.”
Subscribe
