ममता बॅनर्जी २०२४मध्ये पंतप्रधान नरेंद्र मोदींविरुद्ध वाराणसीतून लढणार?

मुक्तपीठ टीम

पश्चिम बंगालमध्ये विधानसभेच्या निवडणुकीच्या दुसर्‍या टप्प्यातील मतदानानंतर भाजप आणि सत्ताधारी तृणमूल काँग्रेस यांच्यात आरोप-प्रत्यारोप वाढले आहेत. काल पंतप्रधान नरेंद्र मोदी यांनी निवडणूक रॅली दरम्यान दावा केला की ममता बॅनर्जी नंदीग्राममध्ये पराभूत होत आहेत. त्यानंतर तृणमूल काँग्रेसने त्यांना प्रत्युत्तर दिले. तृणमूल कॉंग्रेसच्या अधिकृत ट्विटर हँडलवरून केलेल्या ट्विटमुळे पश्चिम बंगालच्या मुख्यमंत्री ममता बॅनर्जी २०२४ मध्ये वाराणसी येथून लोकसभा निवडणूक लढवतील आणि पंतप्रधान नरेंद्र मोदी यांना आव्हान देतील, असा अंदाज बांधला जात आहे.

पंतप्रधान मोदींनी बंगालच्या निवडणूक प्रचारात जयनगरमधील सभेला संबोधित केले. तेथे ते म्हणाले, “दीदी, दुसर्‍या मतदारसंघातून आपण उमेदवारी अर्ज दाखल करणार असल्याच्या या अफवेत काही सत्य आहे काय?”

तृणमूल काँग्रेसने गुरुवारी उशिरा मोदींना उत्तर देणारे ट्विट केले. “दीदी नंदीग्राम जिंकत आहेत. दुसर्‍या जागेवरुन लढण्याचा प्रश्नच उद्भवत नाही. नरेंद्र मोदीजी, पश्चिम बंगालमध्ये उमेदवारी अर्ज दाखल करण्याची मुदत संपली आहे. आपल्या खोटे बोलण्याने लोकांना दिशाभूल करण्याचा प्रयत्न करू नका. वाराणसीत तुम्हाला आव्हान दिलं जाईल म्हणून २०२४ मध्ये एक सुरक्षित जागा शोधा.”

Didi is winning Nandigram. The question of her fighting from another seat doesn’t arise. @narendramodi Ji, retract from your efforts to mislead people before they see your lies with the end of nomination in WB. Look for a safer seat in 2024, as you will be challenged in Varanasi.

— All India Trinamool Congress (@AITCofficial) April 1, 2021

मुख्यमंत्री ममता बॅनर्जींविरोधात भाजपने त्यांचे जुने सहकारी शुभेंदू अधिकारी यांना मैदानात उतरवले आहे. त्यामुळे तेथे चुरशीची स्पर्धा आहे. तेथे मतदान झाल्यानंतर दुसऱ्या ठिकाणच्या प्रचारसभेत ममता बॅनर्जींबद्दल नरेंद्र मोदींनी दुसरीकडून लढण्याचे विधान जाणीवपूर्वक केल्याचे मानले जाते. परंतु तृणमूल काँग्रेसने थेट वाराणसी लढण्याचं प्रतिआव्हान देत रंगत अधिकच वाढवली आहे. तसे करताना उमेदवारी अर्ज भरण्याची मुदत संपल्याची मोदींना जाणीव करून देत त्यांच्या भाषणात मांडलेला मुद्दा अफवाच असल्याचे दाखवून दिल्याचे मानले जात आहे.