मुक्तपीठ टीम
कोरोनामुळे पंतप्रधान नरेंद्र मोदींनी परदेश दौरे थांबवले होते. पण आता परदेश दौऱ्यांसाठी प्रसिद्ध असणारे पंतप्रधान पुन्हा भारताबाहेर जाणे सुरु करणार आहेत. मोदींनी सत्तेवर आल्यापासून परराष्ट्रांशी संबंध सुधारणे आणि मजबूत करण्यासाठी अनेक दौरे केले. आता ते पुन्हा दौऱ्यांवर निघणार आहेत.
या महिन्याच्या २६ तारखेला पंतप्रधान मोदी बांगलादेशचा दौरा करणार आहेत. या बांगलादेश दौर्‍यापासूनच मोदींच्या परदेशी दौर्‍यास सुरुवात होणार आहे. तसेच परराष्ट्र मंत्रालयात पंतप्रधान मोदींच्या मे महिन्यातील यूरोपियन युनियन दौऱ्याची तयारी जोरात सुरु आहे. युरोपियन युनियन दौर्‍यानंतर मोदी जून २०२१ मध्ये ग्रुप -७ देशांच्या बैठकीत भाग घेण्यासाठी ब्रिटनलाही भेट देऊ शकतात. युरोपियन युनियन आणि ब्रिटनच्या भेटीदरम्यान पंतप्रधान त्यांच्या प्रवासाच्या मार्गात काही इतर देशांचा समावेश करू शकतात.
परदेशी पाहुणे भारतात येणार असल्याची चर्चा
- दरम्यान, पंतप्रधान दौऱ्यासोबत काही परदेशी पाहुणे भारतात यावेत यासाठीही चर्चा सुरू आहे.
- सर्वप्रथम, भारतीय विदेश मंत्रालय जपानचे पंतप्रधान योशिहिदे सुगा आणि रशियाचे अध्यक्ष व्लादिमीर पुतीन यांच्या भारत दौऱ्यासंदर्भात जपान आणि रशियाच्या परराष्ट्र मंत्रालयांच्या संपर्कात आहे.
- हे दोन्ही राष्ट्रप्रमुख डिसेंबर २०१९ मध्ये भारत दौर्‍यावर येणार होते, परंतु काही कारणांमुळे त्यांचे दौरे पुढे ढकलण्यात आला होते.
- यावर्षी भारत ब्रिक्स संघटनेचा प्रमुख आहे. त्यामुळे जर कोरोनामुळे परिस्थिती अधिक बिघडली नाही, तर २०२१ च्या मध्यानंतर ब्राझील, रशिया, दक्षिण आफ्रिका आणि चीनचे प्रमुख भारताला भेट देऊ शकतात.
पंतप्रधान नेहमीप्रमाणे परदेशी दौऱ्याची सुरुवात शेजारील देशांपासून करतात. २६ आणि २७ मार्च २०२१ रोजी बांगलादेश दौऱ्यानंतर ते नेपाळलाही भेट देतील. तथापि, शेजारील नेपाळमधील राजकीय वातावरण बघून हा निर्णय घेतला जाणार आहे.
पंतप्रधान नरेंद्र मोदींच्या बहुप्रतिक्षित बांगलादेश दौर्‍याच्या अगोदरच परराष्ट्रमंत्री एस. जयशंकर आज (४ मार्च) ढाका येथे जाणार आहेत. जयशंकर हे ढाकामध्ये बांगलादेशच्या पंतप्रधान शेख हसीना तसेच तेथील परराष्ट्रमंत्री यांची भेट घेणार आहेत. असे म्हटले जात आहे की, जयशंकर मोदींच्या या दौऱ्या दरम्यान होणाऱ्या घोषणांबद्दल बंगलादेशाच्या अधिकाऱ्यांशी अंतिम चर्चा करणार आहेत.
पंतप्रधानांच्या बांगलादेश दौऱ्यात काय?
- पंतप्रधान नरेंद्र मोदी भारत आणि बांगलादेश यांच्यातील राजनैतिक संबंधाना ५० वर्ष पूर्ण होण्यासोबत बांगलादेश स्थापनेला ५० वर्ष पूर्ण होण्याच्या संबंधित आयोजित कार्यक्रमात सहभागी होऊ शकता.
- या दौऱ्यामध्ये पंतप्रधानांकडून बांगलादेशासाठी अतिरिक्त मददीची घोषणाही केली जाऊ शकते.
- व्यापार सहकार्याबाबतही दोन्ही देशांमध्ये एक नवीन घोषणा होण्याची अपेक्षा आहे.
- बांगलादेशाचा ऊर्जापुरवठा वाढवण्याबाबत भारताकडून नवीन घोषणा केल्याचीही चर्चा आहे.
Subscribe
