“शेतकऱ्यांच्या मनात असंतोष, सरकारला काळजीच नाही!”

मुक्तपीठ टीम

नाशिक जिल्ह्यात झालेल्या गारपिटीने शेतकरी वर्ग धास्तावला आहे. त्यांच्या हातातोंडाशी आलेले पिकं ह्या आस्मानी संकटाने हिरावले. परंतु संवेदनाहीन सरकारला शेतकऱ्यांची काळजी नाही, या सरकारने बळीराजाला वाऱ्यावर सोडले आहे, अशा तीव्र शब्दांत विधान परिषदेचे विरोधीपक्ष नेते प्रविण दरेकर यांनी सरकारचा निषेध व्यक्त केला आहे.

नाशिक दौऱ्यावर असलेल्या दरेकर यांनी आज सटाणा तालुक्यातील गारपीटग्रस्त कांदा उत्पादक शेतकऱ्यांच्या बांधावर जाऊन नुकसानीची पाहणी केली व त्यांच्या व्यथा जाणून घेतल्या. तसेच सरकारकडून लवकरात लवकर मदत मिळवून देण्यासाठी प्रयत्न करू, असे आश्वासन दरेकर यांनी दिले.

शेतकऱ्यांच्या भीषण वास्तव जाणून घेताना दरेकर म्हणाले की, शेतकऱ्यांच्या व्यथा आम्ही सभागृहात मांडत असतो, सलग ३ वर्ष हा भाग अवकाळीमुळे त्रस्त असल्यामुळे ज्या पद्धतीने शेतकरी उद्ध्वस्त झाला त्यावर सरकारने गतीने उपाययोजना करणे आवश्यक होते, पण तसे काही झाले नाही. उलटपक्षी जिल्हा बँके कडून मुद्दली पेक्षा मोठ्या प्रमाणात व्याज आकारले जात आहे, तसेच भोगवटाधार २ च्या जमिनी १ करण्यात मोठया प्रमाणात आर्थिक गैरव्यवहार होत असल्याच्या तक्रारी सुद्धा शेतकऱ्यांनी व्यक्त केले असल्याचे दरेकर यांनी स्पष्ट केले.

जिल्हा बँकेने शेतकऱ्यांच्या जमिनी लिलावात न काढता अडचणीत आलेल्या कर्जदाराला कर्जाची पुनर्बांधणी करण्यासाठी भाग पडण्यास प्रयत्न करू. शासनाने गारपिटीमुळे नुकसान ग्रस्त कांदा उत्पादक शेतकऱ्यांना १ लाख रुपये नुकसानभरपाई द्यावी, बियाणे नष्ट झाले आहेत शेतकऱ्यांना ओ.टी.एस द्यावा अशी मागणी शासनाकडे करणार असल्याचे दरेकर यांनी सांगितले.

नाशिकचा शेतकरी हिम्मतवान आहे, ते खचले आहेत परंतु हरले नाहीत. उभारी घेण्याची ताकद बाळगून आहे यासाठी शासनाने विशेष लक्ष देऊन शेतकऱ्यांच्या मदतीला उभं राहावं, अशी मागणी आम्ही सरकारकडे करत आहोत असेही त्यांनी स्पष्ट केले. परंतु केवळ ५०-६० टक्के पंचनामे झालेले दिसून येत आहे त्यामुळे सरकारची संवेदना हरवली असल्याची टीका दरेकर यांनी केली.

शेतकऱ्यांनी आत्महत्या करून प्रश्न सुटणार नाही त्यामुळे विश्वास ठेवावा विरोधी पक्ष नेते देवेंद्र फडणवीस यांच्या सहकार्याने आपले सर्व विषय मार्गी लावू असे आश्वासन दरेकर यांनी दिले. अनेक प्रकरण दौऱ्या अंतर्गत पुढे येतील त्यामुळे आज माझ्या दौऱ्या नंतर सरकार हललेलं दिसेल याची मी ग्वाही देतो तसेच राज्यसरकार बद्दल तीव्र असंतोष शेतकऱ्यांच्या मनात आहे आणि या असंतोषाचा बांध फुटू नये याची काळजी शासनाने घ्यावी, अशी टीकाही दरेकर यांनी केली.

शेतकऱ्यांच्या बाबतीत सुलतानी पद्धतीने विचार करून चालणार नाही, सहानुभूतीने विचार करावा लागेल असे दरेकर यांनी स्पष्ट केले आहे.