पोलिसांनी वर्षाआधी चोर पकडला, ३६ किलो सोने, ६ कोटी रोकडही जप्त! पण ईडी, आयटीला तपासात रस नाही!!

मुक्तपीठ टीम

नोएडाच्या इतिहासातील सर्वात मोठ्या चोरीप्रकरणी पोलिसांनी चोरट्यांना पकडून कोट्यवधी रुपयांचा माल जप्त केला आणि आरोपींना अटक केली आहे. मात्र पोलिसांनी या प्रकरणाचा तपास करण्यासाठी आयकर विभाग आणि ईडीला पत्रही लिहिलं होतं, पण इतर विभागांनी या प्रकरणाचा तपास करण्यात रस दाखवला नाही.

पोलिसांनी याप्रकरणी वर्षाआधीचं चोर पकडला असला तरी भाड्याच्या फ्लॅटमधून ३६ किलो सोने आणि सहा कोटींहून अधिक रुपयांची चोरी झाल्याचे पोलिसांना समजू शकले नाही. हा काळा पैसा कुठून आला, हा काही हवाला व्यवसायाचा भाग होता की हा पैसा आणि सोने इतर कोणत्या मार्गाने येथे आणले गेले? अशा प्रकारची ही पहिलीच घटना आहे, ज्यामध्ये कोटय़वधींची रोकड आणि कोट्यवधींचे सोने जप्त झाल्यानंतरही हे सोने आणि रोख आपलीच होती, असा दावा करायला कोणी तयार नाही.

नेमकं प्रकरण काय?

ऑगस्ट २०२० मध्ये ग्रेटर नोएडाच्या सिल्व्हर सिटी-२ सोसायटीच्या फ्लॅट क्रमांक-३०१ मधून चोरट्यांनी ३६ किलो सोने आणि सहा कोटींहून अधिक किमतीची रोकड चोरली.
नोएडा पोलिसांनी ११ जून २०२१ रोजी सहा आरोपींना अटक करून ही चोरी उघड केली.
या चोरीत दहा आरोपींचा सहभाग असल्याचे सांगण्यात आले.
आतापर्यंत पोलिसांनी चोरट्यांकडून १७ किलो सोने आणि ५७ लाखांची रोकड असा १२ कोटी रुपयांचा माल जप्त केला असून, त्यात रोख रकमेची एफडी मिळण्याबरोबरच सोने तिजोरीत जमा झाले आहे.
याप्रकरणी अटक करण्यात आलेल्या सर्व आरोपींना जामीन मंजूर करण्यात आला आहे.
पोलिसांनी आरोपींचा जामीन रद्द करण्यासाठी न्यायालयात धाव घेतली असून, त्यांचा अर्ज न्यायालयात ठेवला असून, त्यावर शुक्रवारी सुनावणी होणार आहे.
या आरोपींना पुन्हा तुरुंगात पाठवता येईल, असा पोलिसांचा प्रयत्न आहे.

पोलिसांचा तपास सुरू: अतिरिक्त आयुक्त

कायदा व सुव्यवस्था विभागाचे अतिरिक्त आयुक्त लव कुमार यांनी सांगितले की, पोलिसांनी राममूर्ती पांडे आणि त्यांचा मुलगा किशलय पांडे यांना अनेकदा चोरी केलेले सोने आणि पैसे कोणाचे आहेत आणि त्याचे मालक कोण आहेत, याची सत्यता जाणून घेण्यासाठी नोटिसा बजावल्या आहेत, परंतु ते अद्याप आलेले नाहीयत. ही रक्कम कोणाची होती हे त्यांच्या चौकशीनंतरच स्पष्ट होईल. ज्या फ्लॅटमधून हे पैसे चोरीला गेले, तो फ्लॅट त्याने भाड्याने घेतला होता. चोरीच्या घटनेनंतर अटक करण्यात आलेल्या आरोपींच्या चौकशीत ही रक्कम आणि सोनेही त्यांचेच असल्याचा दावा करण्यात आला आहे. मात्र आजपर्यंत या पैशावर आणि सोन्यावर कोणीही दावा केलेला नाही.