"नाशकात शिवसेना - भाजपाचा संगनमताने भ्रष्टाचार!" राष्ट्रवादी काँग्रेसची अजित पवारांकडे तक्रार

मुक्तपीठ टीम

कोरोना काळात नाशिक मनपात भाजपाने भ्रष्टाचार केला. भाजपाचा हा भ्रष्टाचार शिवसेनेच्या संगनमतानेच झाल्याचा गंभीर आरोप राष्ट्रवादी काँग्रेसचे पदाधिकाऱ्यांनी उपमुख्यमंत्री अजित पवार यांच्याकडे केला आहे. त्यामुळे अजित पवार यांनी चौकशीची घोषणा केली आहे. पवार यांच्या उपस्थितीत झालेल्या शहर राष्ट्रवादी काँग्रेसच्या बैठकीत माजी गटनेते गजानन शेलार यांनी मनपात झालेल्या भ्रष्टाचारावर बोट ठेवले.

भाजपाने मनपात गैरप्रकार केले असून, शिवसेनेचे सहकार्य!

राष्ट्रवादी काँग्रेस भवनात झालेल्या शहर कार्यकारिणीच्या बैठकीत शेलार यांनी अनेक तक्रारी केल्या.
भाजपाने मनपात अनेक बाबींमध्ये गैरप्रकार केले असून, त्यास शिवसेनेच्याच काही पदाधिकार्‍यांनी सहकार्य केल्याचे सांगत महासभा ऑनलाइन होत असल्याने तक्रारी करता आल्या नसल्याचेही शेलार यांनी स्पष्ट केले.
त्यावर पालकमंत्री छगन भुजबळ यांनी मनपाच्या कामकाजाबाबत आलेल्या तक्रारींची चौकशी करण्यासाठी प्रकरण पोहोचविण्यात आले असून, ८०० कोटींचे भूसंपादन कसे झाले, याचा छडा लावण्यात येणार असल्याचे नमूद केले.
पुणे, पिंपरी-चिंचवड येथे टीडीआरद्वारे भूसंपादन केले जात असताना नाशिक मनपात मोठ्या प्रमाणावर पैसा वापरला गेल्याचे पवार यांनी सांगितले.

शिवसेनेशी आघाडी नको…

मनपा निवडणुकीसाठी प्रभागरचना करताना शिवसेनेने राष्ट्रवादीला डावलले.
शिवसेनेने त्यांच्या सोयीनुसार प्रभाग तयार करून घेतले असून, याबाबत राष्ट्रवादीच्या नेत्यांना साधी विचारणाही कधी झाली नाही.
राज्यात महाविकास आघाडीचे सरकार असले, तरी आम्हाला विचारले जात नसल्याची खंत बैठकीत व्यक्त करण्यात आली.
राष्ट्रवादीने स्वबळावर निवडणूक लढविल्यास किमान ६० जागा निवडून येतील, असा विश्वास व्यक्त करण्यात आला.
राष्ट्रवादीचा प्रभाव असलेल्या जागांवर शिवसेना हक्क सांगत आहे.
त्यामुळे प्रभागरचनांमध्ये डावलणार्‍या पक्षाशी आघाडी नको.