मुंबईत कोरोनाचा वाढता वेग! आठवडाभरात रोज २००हून ७००वर!

मुक्तपीठ टीम

गेल्या काही दिवसांपासून महाराष्ट्र आणि मुंबईत कोरोनाचा प्रादुर्भाव वाढल्याने चिंता व्यक्त केली जात आहे. मुंबईत गुरुवारी दिवसभरामध्ये ७०४ कोरोना रुग्णांची तर १ कोरोनाबाधित रुग्णाच्या मृत्यूची नोंद झाली आहे. मुंबईतील सक्रिय रुग्णांची एकूण संख्या आता ४ हजार ५५९ झाली आहे.

तज्ज्ञांनी कोरोनाच्या वाढत्या रुग्णसंख्येचा उल्लेख कोरोनाच्या सुप्त लहरीचे संकेत असा केला आहे. मुंबईतील वाढती कोरोना रुग्णसंख्या लक्षात घेता मुंबई मनपाने युद्धपातळीवर चाचण्या वाढवत असतानाच कोरोना उपचारासाठीच्या कोविड सेंटर्सही सज्ज करण्यास सुरुवात केली आहे.

मुंबईत अशी वाढली कोरोना रुग्णसंख्या…

• २५ मे २१८
• २६ मे ३५०
• २७ मे ३५२
• २८ मे ३३०
• २९ मे ३७५
• ३० मे ३१८
• ३१ मे ५०६
• १ जून ७३९
• २ जून ७०४

मुंबईत चाचणी वाढवण्यास मनपाचे आदेश!

• मुंबईतील कोरोना रुग्णांच्या वाढत्या संख्येची गंभीर दखल मुंबई मनपाने घेतली आहे.
• आयुक्त इक्बाल सिंह चहल यांनी मनपा प्रशासनाला सतर्क राहण्यास सांगितले आहे.
• चहल यांनी मुंबईतील कोरोना रोखण्यासाठी मुंबईत चाचणी वाढवण्यास सांगितले आहे.
• याशिवाय १२ ते १८ वयोगटातील बालकांना जास्तीत जास्त कोरोना लसीकरण, जम्बो सेंटर पुन्हा सज्ज ठेवणे, खासगी रुग्णालयांनी सतर्क राहण्याच्या सूचना देण्यात आल्या आहेत.
• पावसाळा येत असतानाच कोरोना रुग्णसंख्या वाढत असल्याने मनपा आयुक्तांनी आरोग्य विभागासह सर्व विभागांना सतर्क राहण्यास सांगितले आहे.

मुंबईत अचानक कोरोना का वाढू लागला?

• कोरोनाच्या रुग्णांच्या वाढीमागे अनेक कारणे असू शकतात.
• कोरोनाचे रुग्ण कमी झाल्यानंतर लोकांची गर्दी वाढली आहे.
• सार्वजनिक ठिकाणी एकमेकांना भेटताना पूर्वीप्रमाणे कोरोना मार्गदर्शक तत्त्वांचे पालन केले जात नाही.
• लोक एकमेकांशी संवाद साधताना मास्कशिवाय दिसतात. त्यामुळे प्रकरणांमध्येही वाढ झाली आहे.
• त्याच वेळी, ओमायक्रॉनच्या BA.4 आणि BA.5 सब व्हेरिएंटचा संसर्ग देखील बहुधा कारणीभूत आहे.
• आरोग्य मंत्री राजेश टोपेंनी सांगितले की, सर्वाधिक सक्रिय प्रकरणे मुंबई, ठाणे आणि पुण्यात आहेत.
• मुंबईतील वाढती कोरोना रुग्णांची संख्या एक सुप्त कोरोना लाटेचे संकेत देत आहे, असंही तज्ज्ञांचं मत आहे.