किरीट सोमय्यांची ईडी हिटलिस्ट वाढली! आघाडीचे २० मंत्री रडारवर!!

मुक्तपीठ टीम

आघाडी सरकारच्या नेत्यांवर आणि मंत्र्यावर घोटाळ्यांचे आरोप करण्याचा सपाटाच भाजपा नेते किरीट सोमय्यांनी लावला आहे. आता त्यांनी आणखी एक गौप्यस्फोट केला आहे. आघाडी सरकारमधील एकूण २० मंत्र्याचे भ्रष्टाचार लवकरच बाहेर येणार असल्याचे त्यांनी सांगितले आहे. त्यामुळे त्यांची ईडी हिटलिस्ट वाढतच असल्याचे दिसत आहे. दरम्यान, अनिल देशमुख, जितेंद्र आव्हाड, प्रताप सरनाईक आणि अनिल परबही जेलमध्ये जातील. त्यावेळी सर्वांचीच झोप उडेल, असा दावा सोमय्यांनी केला आहे.

२० मंत्र्यांची नावे लवकरच पुढे येणार

• किरीट सोमय्या यांनी ठाण्याच्या पाचपाखाडी येथील केबीपी कॉलेजमध्ये भाजपा कार्यकर्त्यांशी संवाद साधला.
• आता ११ ऐवजी २० मंत्र्यांची नावे लवकरच पुढे येणार आहेत.
• मला अनेक ठिकाणाहून फोन येत असतात.
• उद्या कोण टार्गेट आहे असं विचारलं जात असतं.
• कोणाचा भ्रष्टाचार बाहेर येणार असं विचारण्यात येतं.
• मला या नेत्यांच्या भ्रष्टाचाराबद्दल माहिती पुरवली जात असते.

सोमय्यांचा दावा

न्यायालयाने देखील त्यांना हजर राहण्याचे आदेश दिले आहेत. पण ते हजर होत नाही.
आघाडी सरकारमधील माजी मंत्री अनिल देशमुख कुठे आहेत? परमबीर सिंग कुठे आहे? एकाला वर्षावर लपवलंय तर दुसऱ्याला मातोश्रीत लपवलं आहे, असा आरोपही त्यांनी केला. अनिल देशमुख जेव्हा तुरुंगात जातील तेव्हा सर्वांची झोप उडेल.
जितेंद्र आव्हाड, प्रताप सरनाईक आणि अनिल परबही तुरुंगात जातील. म्हाडामध्ये वाझे प्रकरण सुरू जितेंद्र आव्हाड यांच्या प्रकरणाची चौकशी सुरू झाली आहे. म्हाडामध्ये वाझे प्रकरण सुरू झाले आहे, असंही ते म्हणाले.

परबांचा रिसॉर्ट बेकायदेशीर, तोडायचे आदेश ठाकरे सरकारचे

•  उद्धव ठाकरे आणि अन्वय नाईक यांचे संबंध होते.
•  त्याबाबतचे सातबाराचे उतारे समोर ठेवले होते.
•  अनिल परब यांचा रिसॉर्ट बेकायदेशीर होता.
•  तो तोडायचे आदेश ठाकरे सरकारने दिले आहेत.
•  प्रताप सरनाईक यांच्या विहंग गार्डन इमारतीमधील ५ मजले अनधिकृत आहेत.
•  नगर विकास मंत्री एकनाथ शिंदे यांनी ते पाडण्याचे आदेश दिले आहेत.