कोरोना संकटाशी झुंजतानाच महापौरांचं नालेसफाईवरही लक्ष

मुक्तपीठ टीम

पावसाळा जवळ आला की मुंबईला वेध लागतात ते नालेसफाईचे. कारण मुंबईत पडणाऱ्या मोठ्या पावसाचे पाणी वाहून जाणे आवश्यक असते. या पाण्याच्या निचऱ्याचे काम मुंबईतील मोठे नाले करतात. सध्या कोरोना संकटाशी झुंजण्यात मुंबईच्या महापौर, आयुक्त आणि संपूर्ण टीम गुंतलेली आहे. त्यामुळे नालेसफाईचे काय होणार, असा प्रश्न अनेकांना सतावत होता. पण मुंबईच्या महापौर किशोरी पेडणेकर गेले काही दिवस नालेसफाईवर स्वत: देखरेख करत फिरत आहेत. त्यांनी दिलेल्या माहितीनुसार नेहमीप्रमाणे याही वर्षी नालेसफाईची सुरुवात फेब्रुवारीतच झाली. कोरोनाच्या काळामध्येही नालेसफाईच्या कामांमध्ये कुठल्याही प्रकारे खंड न पडता नालेसफाईचे काम जोरात सुरू असल्याचे महापौरांनी सांगितले. आतापर्यंत मुंबईच्या पश्चिम उपनगरात ७२ टक्के नालेसफाईचा महापौरांनी दावा केला आहे.

उपनगरातील राजेंद्र नगर नालाच्या सफाई कामांची पाहणी करताना महापौर किशोरी पेडणेकर, उप महापौर अँड. सुहास वाडकर, सभागृह नेत्या विशाखा राऊत ,स्थापत्य समिती अध्यक्ष (उपनगरे) श्री. स्वप्निल टेंबवलकर व महापालिका अधिकारी उपस्थित होत्या. pic.twitter.com/ZbcdUrmbwa

— Kishori Pednekar (@KishoriPednekar) May 11, 2021

पश्चिम उपनगरातील काही नालेसफाईच्या कामांची पाहणी महापौरांनी सभागृहनेत्या विशाखा राऊत आणि स्थायी समिती अध्यक्ष यशवंत जाधव यांच्यासह केली. पावसाळ्याच्या दिवसांमध्ये मुंबईतील नागरिकांना कुठल्याही प्रकारे त्रास होऊ नये, यासाठी अधिक खबरदारी घेण्यात येत असल्याचा दावाही महापौर किशोरी पेडणेकरांनी केला आहे. याआधी पावसाळ्यात किमान दोन ते तीन दिवस पाण्याचा निचरा होत नसे. आता उदंचन केंद्रांच्या कामामुळे पाण्याचा निचरा हा दोन ते तीन तासांत होत असतो, असा दावाही त्यांनी केला.

दहिसर येथील दहिसर नदीवर पुलाच्या कामासाठी बांधण्यात आलेली बँड वॉल काढून टाकण्याचे निर्देशही महापौरांनी दौऱ्याच्यावेळी दिले. दहिसर गावठाणचा परिसर जलमय होणार नाही, यादृष्टीने काम लवकर पूर्ण करण्यासही महापौर किशोरी पेडणेकर यांनी बजावले आहे. मुंबईतील नालेसफाईच्या संपूर्ण कामावर महाराष्ट्राचे मुख्यमंत्री उद्धव ठाकरे, पर्यावरण मंत्री आदित्य ठाकरे यांचे लक्ष असून त्यादृष्टीने ते सतत नालेसफाई कामांचा आढावा घेत असल्याचे महापौरांनी सांगितले.

हिंदमाता परिसर पूरमुक्त करण्यासाठी टाकीचा प्रस्ताव

• दक्षिण मध्य मुंबईतील हिंदमाता परिसरात कायम पाणी साचते.
• तेथील पाणी साचण्याची समस्या लक्षात घेता, त्याठिकाणी स्टोरेज टँक बनविण्यात येणार आहे.
• या पावसाळ्यात मुंबईकरांना जास्तीत जास्त दिलासा देण्याचा मनपाचा प्रयत्न असणार आहे.

महापौरांच्या नाले सफाई दौऱ्यांमध्ये आमदार विलास पोतनीस , सुधार समिती अध्यक्ष सदानंद (सदा) परब, अतिरिक्त आयुक्त (प्रकल्प ) पी. वेलरासू, शिक्षण समिती अध्यक्षा संध्या दोशी, स्थापत्य समिती अध्यक्ष (उपनगरे) स्वप्निल टेंबवलकर , नगरसेविका रोहिणी कांबळे, शीतल म्हात्रे, सुजाता पाटेकर, उपायुक्त (परिमंडळ- ३) पराग मसुरकर, उपायुक्त (परिमंडळ -७ ) विश्वास शंकरवार, उपायुक्त (पायाभूत सुविधा ) अनंत कदम, एच/ पूर्व विभागाच्या सहाय्यक आयुक्त अलका ससाणे, एच/ पश्चिम विभागाचे सहाय्यक आयुक्त विनायक विसपुते, के/ पश्चिम विभागाचे सहाय्यक आयुक्त विश्वास मोटे, पी/ दक्षिण विभागाचे सहाय्यक आयुक्त संतोषकुमार धोंडे, आर/ मध्य विभागाच्या सहाय्यक आयुक्त डॉ. भाग्यश्री कापसे, आर /उत्तर विभागाच्या सहाय्यक आयुक्त संध्या नांदेडकर, प्रमुख अभियंता (प.ज.वा.) व्यंकटेश कमलापुरकर तसेच संबंधित विभागाचे अधिकार उपस्थित होते.

पाहा व्हिडीओ: