मुक्तपीठ टीम
भारतीय गीर जातीच्या गायींवर ब्राझीलमध्ये संशोधन होऊन अधिक दुधाळ संकर तयार झालेले आहे. ही नवीन संकरित गीर गाय दिवसाला २५-२७ लीटर दूध देते. या गीर जातीच्या संकरित गायी भारतात आणून शेतकऱ्यांना दिल्यास त्यांचा फायदा होऊ शकेल. त्यामुळे शेतकऱ्यांचा जोडधंदा म्हणून असणाऱ्या दुग्ध व्यवसायाची भरभराट होईल. यासोबतच सानेन या जातीच्या बकऱ्या, ज्या दिवसाला १०-१२ लीटर दूध देतात. या बकरीचे संकर नेदरलँड, ऑस्ट्रेलिया, कॅनेडा, इस्राईल येथे मोठ्या प्रमाणात आहेत. या गायी आणि बकऱ्या शेतकऱ्यांना मिळाल्या तर दुग्धव्यवसायाद्वारे रोजगार वाढीसाठीही मदत होऊ शकेल. त्यामुळे या गायी आणि बकऱ्या आयात करून महाराष्ट्रात आणण्याची परवानगी मिळावी, अशी मागणी महाराष्ट्राचे पशुसंवर्धन मंत्री सुनील केदार यांनी केंद्रीय पशुसंवर्धन मंत्री पुरूषोत्तम रूपाला यांच्याकडे केली.
जनावरांचा विम्याचा निधी, राष्ट्रीय पशुधन मिशनअंतर्गत राज्याकडून येणाऱ्या प्रस्तावास मंजुरी आणि परदेशी संकरित गायी आणि बकऱ्यांना आयातीबाबत परवानगी मिळावी या पशुसंवर्धनसंदर्भातील महत्वाची बैठक केंद्रीय पशुसंवर्धन मंत्री पुरूषोत्तम रूपाला आणि महाराष्ट्राचे पशुसंवर्धन मंत्री सुनील केदार यांच्या उपस्थितीत झाली. पशुंच्या आयातीसंदर्भात परराष्ट्रीय व्यवहार मंत्रालयाकडून काही परवानग्यांची आवश्यकता असते, त्या मिळण्यासाठी केंद्रीय पशुसंवर्धन मंत्रालयाकडून सहकार्य मिळावे, अशी मागणी केदार यांनी केंद्रीय मंत्र्याकडे केली.
केदार यांनी केंद्रीय मंत्री श्री रूपाला यांची कृषी भवन येथे भेट घेतली. बैठकीत राज्याशी निगडीत पशुसंवर्धन विषयावर सविस्तर चर्चा झाली. राज्यातील जनावरांच्या विम्यासंदर्भातील प्रस्ताव केंद्राकडे पाठविण्यात आलेला आहे. केंद्राकडून या प्रस्तावास मंजुरी मिळावी तसेच याबाबतचा निधी शक्य तितक्या लवकर उपलब्ध करून मिळावा, अशी मागणी श्री.केदार यांनी यावेळी केली.
यासह राष्ट्र पशुधन मिशनमध्ये विविध जाती विकसित करण्याबाबत प्रस्तावास मंजुरी तसेच या मिशनअंतर्गंत मिळणारा निधी उपलब्ध व्हावा, अशी मागणीही केली. या प्रस्तावास मंजुरी मिळाल्यास पशुच्या विविध जातीचे संकर विकसित करण्यास गती येईल, असेही श्री.केदार यांनी सांगितले.
Subscribe
