मुक्तपीठ टीम
डिसेंबर महिन्याच्या पहिल्याच तारखेला महागाई वाढली आहे. एलपीजी कमर्शियल गॅस सिलिंडरच्या किंमती १०० रुपयांनी वाढल्याने व्यवसायिकांना महागाईचा चांगलाच झटका बसला आहे. घरगुती एलपीजी सिलिंडरच्या किंमतीत कोणताही बदल करण्यात आलेला नसल्यामुळे सर्वसामान्यांसाठी ही दिलासादायक बाब आहे. पेट्रोलियम कंपन्यांनी व्यावसायिक सिलिंडरच्या दरात ही वाढ केली आहे. गेल्या महिन्यात २६६ रुपयांनी महागला होता, आता त्यात १०० रुपयांनी वाढ करण्यात आली आहे. मुंबईमध्ये सध्या व्यवसायिक गॅस सिलिंडरचे दर २०५१ रुपयांवर पोहोचले आहेत. कमर्शियल गॅस सिलिंडरचा वापर हा हॉटेल, रस्त्यांवरील खाद्यवस्तू विक्रेते अन्नपादर्थ तयार करण्यासाठी करतात. त्यामुळे बाहेरचे खाणे महाग होण्याची शक्यता आहे.
सातत्याने सिलिंडरच्या किंमतीत वाढ
- गेल्या काही दिवसांपासून सिलिंडरच्या किंमतीत सातत्याने वाढ होत आहे.
- १ डिसेंबरला व्यावसायिक सिलिंडरच्या दरामध्ये १०० रुपयांनी वाढ केली आहे.
- दिल्लीमध्ये व्यवसायिक सिलिंडरची किंमत 2100 रुपये झाली आहे.
- दोन महिन्यांपूर्वी तो १७३३ रुपये होते.
- मुंबईमध्ये सध्या व्यवसायिक गॅस सिलिंडरचे दर २०५१ रुपयांवर पोहोचले आहेत.
- त्याचबरोबर कोलकातामध्ये २१७४.५० रुपये तर चेन्नईमध्ये १९ किलोच्या गॅस सिलिंडरसाठी २२३४ रुपये मोजावे लागणार आहेत.
घरगुती एलपीजी सिलिंडर ग्राहकांना दिलासा
- एकीकडे व्यावसायिक सिलिंडरच्या किंमतीत वाढ केली असताना दुसरीकडे घरगुती गॅस सिलिंडरच्या किंमतीत काहीही बदल करण्यात आलेला नाही आहे.
- मुंबईत घरगुती सिलेंडरची किंमत ८९९.५० रुपये आहे.
- दिल्लीत १४.२ किलोच्या विनाअनुदानित गॅस सिलेंडरची किंमत दिल्लीत ८९९.५० रुपये आहे.
- ६ ऑक्टोबर रोजी त्याची किंमत वाढवण्यात आली होती.
आतापर्यंतचे मुंबईतील एलपीजी सिलिंडरच्या किंमती
- जानेवारीत मुंबईत एलपीजी सिलिंडरची किंमत ६९४ रुपये होती, ती फेब्रुवारीमध्ये ७१९ रुपये प्रति सिलिंडर करण्यात आली.
- १५ फेब्रुवारीला त्याची किंमत ७६९ रुपये करण्यात आली.
- यानंतर २५ फेब्रुवारीला एलपीजी सिलिंडरची किंमत ७९४ रुपये झाली.
- मार्चमध्ये एलपीजी सिलिंडरची किंमत ८१९ रुपये झाली होती.
- जुलैमध्ये ८३४.५०, तर १८ ऑगस्टला २५ रुपयांनी वाढून ८५९.५० रुपये झाले.
- यानंतर १ सप्टेंबरला त्यात २५ रुपयांनी वाढ झाली आणि ऑक्टोबरमध्ये १५ रुपयांनी महाग झाला.
Subscribe
