कणकवलीतील डेल्टा प्लस कोरोनाचा रुग्ण ठणठणीत बरा!

मुक्तपीठ

कोरोनाच्या नव्या डेल्टा प्लस वेरिएंटचे राज्यात २१ रुग्ण समोर आले आहेत.सर्वत्र भीतीचं वातावरण निर्माण झालं आहे. दरम्यान कणकवलीमधून एक दिलासादायक बातमी समोर आली आहे. कणकवलीमधील परबवाडी येथील डेल्टा प्लसचा सापडलेला रुग्ण हा उपचारानंतर बरा झालेला आहे. तरीही कणकवली शहरातील नागरिकांनी पालन करत मास्क वापरणे, वारंवार हात धुणे,सोशल डिस्टन्सिंग पाळणे इत्यादी कोरोना नियमाची काटेकोर अंमलबजावणी करावी, असे आवाहन नगराध्यक्ष समीर नलावडे यांनी केले आहे.

नगराध्यक्ष समीर नलावडेंनी दिली माहिती-

डेल्टा प्लस वेरिएंटचा रुग्ण महिन्याभरापूर्वी आढळला होता.
मात्र तो रुग्ण ज्या परिसरात राहतो तिथे कोरोना संसर्गाचा प्रसार झालेला नसल्याचेही नलावडे यांनी सांगितले.
त्यामुळे नागरिकांनी कोणत्याही अफवांवर विश्वास ठेवू नये.
कणकवली नगरपंचायत व आरोग्य विभाग यांच्याकडून सर्व त्या खबरदारीच्या उपाययोजना सुरु करण्यात आल्या आहेत.
कणकवली नगरपंचायत हा रुग्ण सापडल्याच्या पार्श्वभूमीवर सतर्क असून, नगरपंचायतीने सर्व त्या खबरदारीच्या उपाययोजना हाती घेतल्या आहेत. अशी माहिती नलावडे यांनी दिली.

कणकवली नगरपंचायत घेत आहे खबरदारी-

या कॉम्प्लेक्समधील नागरिकांचे स्वब घेण्यात येत आहेत.
कॉम्प्लेक्स मधील प्रत्येक नागरिकांचे थर्मल स्क्रीनिंग व ऑक्सिजन लेव्हल चेक करण्यात येत आहे.
हा रुग्ण पूर्ण उपचारानंतर ठणठणीत बरा झाला आहे.
कणकवली नगरपंचायत , आरोग्य विभाग व महसूल विभाग यांच्याकडून नियमित आढावा घेण्यात येत आहे.
परबवाडीच्या त्या भागातील लोकांची आरोग्य विषयक माहितीही संकलित करण्यात येत आहे.