मुक्तपीठ टीम
भाजपातून राष्ट्रवादी काँग्रेसमध्ये आलेले एकनाथ खडसे यांना ईडीने पुन्हा नोटीस बजावल्याने त्यांच्या अडचणी वाढल्या आहेत. जमीन घोटाळा प्रकरणात जप्त केलेली मालमत्ता दहा दिवसांत रिकामी करण्याचे निर्देश खडसेंना दिले आहेत. तसे न केल्यास खडसेंच्या जप्त केलेल्या मालमत्तांवर कायदेशीरित्या कारवाई केली जाईल, असा इशारा या नोटीशीतून देण्यात आला आहे. खडसेंसोबत इतर चार जणांनाही नोटीसा बजावण्यात आल्या आहेत.
काय आहे प्रकरण?
- जेव्हा विरोधी पक्षनेते देवेंद्र फडणवीस मुख्यमंत्री होते तेव्हा एकनाथ खडसे महसूल मंत्री होते.
- त्यावेळेस त्यांनी आपल्या पदाचा गैरवापर करत भोसरी येथील ३.१ एकर एमआयडीसीचा फ्लॅट खरेदी केला असल्याचा आरोप करण्यात आला होता.
- तसेच या फ्लॅटची किंमत ३१ कोटी रुपये असून हा फ्लॅट ३.७५ कोटी रुपयांमध्ये विक्री झाला असल्याचा दावा करण्यात आला होता.
- त्यामुळे कमी बाजारभाव दाखवून हा व्यवहार झाला असल्याचा आरोप करण्यात आला होता.
- या प्रकरणामुळे खडसे अनेक वेळा अडचणीत आले आहेत.
कोणकोणत्या मालमत्तेचा समावेश?
- मालमत्ता १० दिवसांमध्ये रिकामे करण्याचे आदेश गेल्यावर्षी ऑगस्ट महिन्यात ईडीकडून खडसेंची ५ कोटी ७५ लाखांची संपत्ती जप्त करण्यात आली होती.
- यात जळगाव, लोणावळा येथील फ्लॅट्स, बंगले, भूखंडाचा सामावेश होता.
- लोणावळ्यातील बंगला आणि जळगावमधील ३ फ्लॅट आणि ३ मोकळे भूखंड ईडीने जप्त केले होते.
खडसेंना पुन्हा ईडीचा इशारा…
- ही मालमत्ता १० दिवसांमध्ये रिकामे करण्याचे आदेश ईडीने दिले आहेत.
- तसे नाही केल्यास कायदेशीररित्या या मालमत्ता रिकाम्या केल्या जातील असे नोटीशीत नमूद केले आहेत.
- तसेच संबंधित मालमत्ता विक्री, भाडेकरारावर किंवा हस्तांतरण करण्याची परवानगी कोणालाही देण्यात येऊ नये, असे नोंदणी महानिरिक्षक आणि संबंधित जिल्हाधिकाऱ्यांनाही कळवण्यात आले आहे.
Subscribe
