गोव्यानंतर आता महाराष्ट्र! नागपुरात देवेंद्र फडणवीसांचा निर्धार

मुक्तपीठ टीम

गोव्यात भाजपाला मिळालेल्या घवघवीत यशानंतर आता विरोधी पक्षनेते देवेंद्र फडणवीस यांनी महाराष्ट्राकडे लक्ष केंद्रीत केलं आहे. गोव्याचे निवडणूक प्रभारी म्हणून देवेंद्र फडणवीस यांच्या कामगिरीचं कौतुक झालं. बहुमतापासून १ आकडा लांब राहिलेल्या भाजपाने अपक्षांच्या मदतीने सत्तेची सूत्र जमवली. आता गोव्याच्या मुख्यमंत्रीपदी प्रमोद सावंत हे विराजमान होणार आहेत. या यशामागचं कारण देवेंद्र फडणवीसांनी नागपुरात सांगितलं.

काय म्हणाले देवेंद्र फडणवीस ?

• गोव्यात कार्यकर्त्यांच्या मदतीने भाजपानं संधीचं सोनं केलं.
• गोव्यामध्ये केंद्रीय मंत्री नितीन गडकरीही प्रचारासाठी आले होते.
• गोवा, उत्तरप्रदेश, उत्तराखंड, मणिपूर याठिकाणी भाजपाला मिळालेलं मत हे विकासाला मिळालेलं मत आहे.
• पंतप्रधान नरेंद्र मोदी यांच्या नेतृत्त्वात देश बदलतोय.
• नितीन गडकरींच्या माध्यमातून रस्ते तयार होत आहेत.
• देशात प्रत्येकाला मोफत कोरोना लसीकरण करण्यात आलंय.
• वीस हजार लोकांना युक्रेनमधून काढण्यात आलं. हे भाजपप्रती असलेलं विश्वासाचं वातावरण आहे.

फडणवीसांची विरोधकांवरही टीका

• गोव्यात शिवसेना आणि राष्ट्रवादी आपले नशीब आजमावयला आले होते. पण, गोव्याच्या मतदारांनी त्यांना त्यांची जागा दाखविली.
• शिवसेना, राष्ट्रवादीचे हे मुंगेरीलाल के हसीनं सप्ने होते, अशी टीका फडणवीसांनी केली.
• गोव्यात शिवसेना, राष्ट्रवादीची लढाई ही नोटाशी आहे.
• शिवसेना, राष्ट्रवादीच्या एकाही उमेदवाराचं डिपाझिट राहिलं नाही, याची आठवण त्यांनी करून दिली.
• “महाविकास आघाडी नव्हे महावसुली आघाडी सरकार”
• राज्यात भ्रष्टाचारी सरकारविरोधात सामान्य माणूस भाजपाच्या सोबत आहे.
• राज्यातील सरकार हे महाविकास आघाडी नाही, ही महावसुली आघाडी आहे.
• सरकारमधील दोन मंत्री तुरुंगात आहेत. राज्य सरकारच्या भ्रष्टाचाराविरोधातील लढाई शिगेला पोहचली आहे.
• प्रवीण दरेकरांना फसवण्याचा प्रयत्न झाला. तरीही तुमच्या भ्रष्टाचाराबद्दल बोलणं थांबणार नाही.
• गोवा तो झाकी है, महाराष्ट्र अभी बाकी है. महाराष्ट्रात एकहाती सत्ता आणणार.