गुन्हे महत्त्वाचे: 1)कल्याण-डोंबिवली महापालिका हद्दीत मागील काही दिवसांपासून करोना रुग्णांची संख्या वाढू लागल्याने प्रशासनाकडून कडक निर्बंध लागू करण्यात आले आहेत. मात्र, शासनाकडून आखून दिलेल्या नियमाची पायमल्ली सुरूच आहे. कल्याण पूर्वेत नियमाची पायमल्ली करत बुधवारी संध्याकाळी ७०० लोकांच्या उपस्थितीत रंगलेल्या जंगी विवाह सोहळ्याच्या आयोजकांविरोधात पालिका प्रशासनाच्या तक्रारीवरून गुन्हा दाखल करण्यात आला आहे. 2)अकोल्यात आईची हत्या केल्याप्रकरणी मुलीला अटक करण्यात आली आहे. आर्थिक व्यवहारातून सख्ख्या मुलीनेच आपल्या आईला संपवल्याने आश्चर्य व्यक्त केलं जात आहे. माहेरकडून जमीन मिळाल्यानंतरही आर्थिक देवाणघेवाणीवरुन वाद झाला. अखेर मुलीने आईला दगडावर आपटून मारलं. 3)महादेवाचे त्रिशूळ वर्ध्यातील वृद्धासाठी मृत्यूचा फास ठरले. त्रिशूळात मान अडकल्यामुळे वृद्धाचा मृत्यू झाल्याची धक्कादायक घटना समोर आली आहे. दारुच्या नशेत पूजा करताना हा प्रकार घडल्याचा प्राथमिक अंदाज आहे. ऐन महाशिवरात्रीच्या दिवशी घडलेल्या या घटनेमुळे सर्वत्र हळहळ व्यक्त केली जात आहे. 4)८ वर्षांच्या मुलीवर लैंगिक अत्याचार करणाऱ्या टॅक्सीचालकास ठाणे न्यायालयाने नुकतीच १० वर्षांच्या कारावासाची शिक्षा ठोठावली. ही पीडित मुलगी आणि आरोपी एकाच सोसायटीमध्ये राहतात. 5)संचारबंदीच्या वेळेत एकत्र जमून धिंगाणा घालणाऱ्या तरुणांवर कायदेशीर कारवाई करण्यासाठी गेलेल्या पोलिस कर्मचाऱ्यावर दोघांनी कोयत्याने वार करून जीवे मारण्याचा प्रयत्न केला. अलंकार पोलिस ठाण्याच्या हद्दीत एरंडवण्यात हा प्रकार घडला. या प्रकरणी दोघांना अटक करण्यात आली आहे.