मढ बेटावरील आलिशान बंगला, पोर्न फिल्म निर्मितीचा अड्डा!

मुक्तपीठ टीम

मालाडमधील मढ बेटावरील एका बंगल्यावर गुरुवारी ४ फेब्रुवारीला मुंबईतील गुन्हे शाखेने धाड टाकली. या धाडीमध्ये अश्लील चित्रपट तयार करणाऱ्या एका टोळीला रंगेहात पकडले आहे. प्रोडक्शन हाऊसमधील पाच जणांना अटक करण्यात आली. यामध्ये दोन स्त्रीया, फोटोग्राफर आणि ग्राफिक डिझायनरचा समावेश आहे, जे मढ बेटावर एका बंगल्यामध्ये लाईव्ह अश्लील चित्रपट शूट करत होते.

मिळालेल्या माहितीनुसार मढ बेटावरील अनेक बंगल्यांमध्ये फिल्म शूटच्या नावाखाली वेश्याव्यवसाय आणि असे इतर वाईट धंदे केले जातात.

पोलिसांनी सांगितल्याप्रमाणे, “या टोळीमध्ये दोन मुलींचा समावेश देखील आहे. आश्चर्याची गोष्ट म्हणजे, या मुली इतर मुलींना चित्रपटात काम देण्याचे आमिश दाखवून त्यांची फसवणूक करुन त्यांना हे काम करण्यासाठी भाग पाडतात.”

पोलिसांनी जुन्या फेरी मार्गावरील ग्रीन पार्कच्या बंगल्यावर छापा टाकला आणि अश्लील चित्रपटाची शूटिंग करणाऱ्या संपूर्ण टीमला पकडले. पोलिसांनी एका २५ वर्षीय मुलीची सुटका केली आहे, आणि तिला आता पुनर्वसन केंद्रात पाठवण्यात आले आहे.

आरोपींविरोधात फसवणूक, सार्वजनिकपणे अश्लील कृत्याचे प्रदर्शन, अश्लील साहित्य आणि माहिती तंत्रज्ञान कायद्याअंतर्गत गुन्हा दाखल करण्यात आला आहे. पोलिसांनी या प्रोडक्शन हाऊसचे बॅंक अकाउंटदेखील फ्रीझ केले आहे, ज्यात ३६.५० लाख रुपये आहेत.

पोलीस उपायुक्त प्रकाश जाधव म्हणाले, “पोलिसांनी हायडेफिनेशन डीआरवी व्हिडीओ कॅमेरा, सहा मोबाईल फोन, लॅपटॉप, स्पॉटलाइट, कॅमेरा स्टॅंड, अश्लील व्हिडीओ असलेले मेमरी कार्ड आणि स्क्रिप्ट देखील जप्त केली आहे.”