मुक्तपीठ टीम
आजकालच्या तंत्रज्ञानाच्या युगात अनेक फसवणुकीचे प्रकार आपण बघतो, ऐकतो. मात्र चक्क उपमुख्यमंत्री अजित पवार यांच्या मोबाईल क्रमांकाचा गैरवापर करत पुण्यातील बड्या बांधकाम व्यवसायिकाला धमकी दिल्याची धक्कादायक घटना समोर आली आहे. अजित पवार यांचा पीए चौगुले बोलत असल्याचं सांगून आरोपींनी २० लाख रुपयांची खंडणी मागितल्याचा आरोप केला जात आहे.
काय आहे प्रकरण ?
- उपमुख्यमंत्री अजित पवार यांचा पीए चौगुले बोलत असल्याचं सांगून आरोपींकडून १३ जानेवारीपर्यंत दहा दिवसांपासून धमकीचा प्रकार सुरु होता.
- आरोपींनी संगनमताने गूगल प्ले स्टोर वरून फेक कॉल ॲप नावाचे ॲप डाऊनलोड केले.
- याच्या मदतीने त्यांनी उपमुख्यमंत्री अजित पवार यांचा मोबाईल क्रमांकाचा वापर करून बांधकाम व्यवसायिकाला फोन केला.
- आणि अजित पवार यांचा पीए चौगुले बोलतोय असं सांगून वीस लाख रुपये देण्याची मागणी केली.
- तसेच वाडेबोलाइ येथील बाबा चोरमले आणि इतर नऊ जणांच्या मालकीच्या जमिनीचा वाद मिटवून टाका असे सांगितले होते.
- अखेर बिल्डरने पोलीस स्टेशनमध्ये धाव घेत तक्रार दाखल केली.
बंडगार्डन पोलीस स्टेशनमध्ये गुन्हा दाखल
- वीस लाख रुपयांची खंडणी मागितल्याप्रकरणी ६ जणांना अटक करण्यात आली.
- गुन्हे शाखेच्या युनिट १ पथकाने ही कारवाई केली.
- बंडगार्डन पोलीस स्टेशनमध्ये गुन्हा दाखल करण्यात आला आहे.
- बंडगार्डन पोलीस ठाण्यात IPC ३८४, ३८६, ५०६, ३४ आयटी ॲक्ट कलम ६६ (सी), (डी) नुसार गुन्हा दाखल करण्यात आला आहे.
- नवनाथ भाऊसाहेब चोरमले, सौरभ नारायण काकडे, सुनील उर्फ बाळा गौतम वाघमारे, किरण रामभाऊ काकडे, आकाश शरद निकाळजे, चैतन्य राजेंद्र वाघमारे अशी अटक करण्यात आलेल्या आरोपींची नावे आहेत.
Subscribe
