मुक्तपीठ टीम
कोरोना संकट हाताळणीमुळे देशभर कौतुकाचा विषय ठरलेली मुंबई मनपा आणखी एका कारणामुळे प्रशंसेस पात्र ठरणार आहे. एकीकडे देशभरातील बहुसंख्य स्थानिक स्वराज्य संस्था आर्थिक गरजांसाठी राज्य सरकारवर अवलंबून राहतात. त्याचवेळी मुंबई मनपा मात्र आपल्या गरजा भागवून पुन्हा तब्बल ८० हजार कोटींच्या ठेवी बाळगून आहे. या ठेवी एफडी रुपात विविध सरकारी आणि खासगी बँकांमध्ये आहेत. तेवढंच नाही तर निव्वळ या ठेवींच्या बळावर मुंबई मनपाने १६०० कोटी रुपयांचे व्याज उत्पन्नही मिळवले आहे.
अतिरिक्त मनपा आयुक्त पी. वेलरासू यांनी दिलेल्या माहितीनुसार, या वर्षाच्या अर्थसंकल्पात, महापालिकेने मुंबई कोस्टल रोड सारख्या मेगा प्रोजेक्ट तयार करण्यासाठी पायाभूत सुविधा विकास निधीशी संलग्न ५०,९५२ कोटी रुपयांच्या एफडीमध्ये बदल केला आहे. कर्मचार्यांच्या प्रॉव्हीडन्ट फंड आणि पेन्शन खात्यात असलेल्या २६,२८३ कोटी रुपयांच्या एफडीचीही महापालिका संरक्षक आहे. मनपा एफडीवर वर्षाकाठी सुमारे १८०० कोटी व्याज मिळवते. मागील वर्षी व्याज कपातीमुळे ही रक्कम ७०० कोटी रुपयांनी कमी झाली होती, परंतु चालू आर्थिक वर्षात महापालिकेला सुमारे १६०० कोटी रुपये व्याज मिळाले आहे.
यावर्षी महापालिकेचे आयुक्त इक्बाल चहल यांनी ३९,०३८ कोटी रुपयांचे बजेट जाहीर केले होते. साथीच्या काळात उत्पन्नातील घट असूनही, अर्थसंकल्पात गेल्या वर्षीच्या, ३३,४४१ कोटी रुपयांच्या तुलनेत सुमारे १६.७ टक्के वाढ झाली आहे.
प्रशासनाने वाढता खर्च पूर्ण करण्यासाठी १०,५६४ कोटी रुपयांचे व्याजमुक्त कर्ज घेतले. त्यापैकी ५,८७६ कोटी रुपये दोन विभागांतर्गत ठेवलेल्या निधीतून कर्ज म्हणून उभे केले जाणार होते. महानगरपालिकेच्या अधिकाऱ्यांनी सांगितले की, ३५०० कोटी रुपये हा उद्यान विकास निधीतून आहे, जो दीर्घकालीन संपत्ती निर्माण करण्यासाठी आहे. तर २,३७६ कोटी रुपये भांडवलाच्या कामांसाठी वापरता येतील.
Subscribe
