शिवाजी पार्क दसरा मेळावा: शिवसेनेला परवानगी नाकारली, आता काय होणार?

मुक्तपीठ टीम

शिवसेनेच्या नेत्यांना भीती वाटत होती, तेच घडलं आहे. शिवसेनेच्या पारंपरिक दसरा मेळाव्याला मुंबई मनपाने परवानगी नाकारली आहे. शिवसेना आणि शिंदे गटाने परवानगीसाठी केलेले अर्ज मुंबई महापालिकेने फेटाळले आहेत. त्यासाठी कायदा-सुव्यवस्थेचे कारण देण्यात आले आहे. अर्थात, असं असलं तरी तेथेच मेळावा घेण्यासाठी शिवसेनेचा निर्धार कायम आहे, त्यामुळे उच्च न्यायालयातूनही परवानगी मिळाली नाही तरीही शिवसेना तेथेच मेळावा घेण्यासाठी गनिमी कावा वापरण्याची शक्यता आहे.

दोन्ही अर्ज महापालिकेकडे परवनगीच्या प्रतीक्षेत होते!!

• शिवसेनेचा दसरा मेळावा दादर येथील शिवाजी पार्क येथे आयोजित करण्यासाठी शिवसेनेच्यावतीने २२ ऑगस्ट रोजी महापालिकेच्या जी उत्तर विभागाकडे अर्ज केला होता.
• तर त्यानंतर काही दिवसांनी शिंदे गटाचे स्थानिक आमदार सदा सरवणकर यांनीही शिवाजी पार्क येथे दसरा मेळावा आयोजित करण्यासाठी परवानगीकरता अर्ज दाखल केला होता.
• हे दोन्ही अर्ज महापालिकेकडे परवनगीच्या प्रतीक्षेत होते.
• दरम्यान, शिंदे गटाला वांद्रे कुर्ला संकुलातील मैदानात दसरा मेळावा आयोजित करण्यास परवानगी मिळाल्यानंतर शिवसेनेचे विभागप्रमुख महेश सावंत, उपनेते मिलिंद वैद्य यांच्यासह पदाधिकाऱ्यांनी जी उत्तर विभागाकडे याबाबत माहिती घेण्याचा प्रयत्न केला होता.
• त्यामध्ये जी उत्तर विभागाने या परवानगीबाबत विधी विभागाकडे अभिप्राय मागवण्यात आल्याचे लेखी उत्तर शिवसेनेला दिले होते.

मुंबई पालिकेनं दोन्ही गटांना परवानगी नाकारली!!

• या सर्व पार्श्वभूमीवर महापालिकेला पोलीस उपायुक्तांकडून पत्र प्राप्त झाल्याची माहिती मिळत आहे.
• अनंत चतुर्दशीच्या दिवशी गणेश विसर्जनाच्यावेळी दोन्ही शिवसेना गटांमध्ये झालेली हाणामारी आणि त्यानंतर दुसऱ्या दिवशी दादर पोलीस ठाण्याबाहेर दोन्ही गटांमध्ये घडलेल्या घटनांचा संदर्भ देत आजही दोन्ही गटांमध्ये वाद कायमच असल्याचे या पत्रात म्हटले आहे.
• अशा परिरिस्थितीत शिवाजी पार्कसारख्या संवेदनशील परिसरात दोन्ही गटापैंकी एकाला परवानगी दिल्यास त्यामुळे या परिसरात कायदा आणि सुव्यवस्थेचा प्रश्न निर्माण होऊ शकतो,असे या पत्रात म्हटले असल्याची माहिती मिळत आहे.
• त्यामुळे पोलिसांच्या पत्रानंतर महापालिकेच्या जी उत्तर विभागाने दोन्ही गटाला शिवाजी पार्क येथे दसरा मेळाव्याला परवानगी नाकारण्याचा निर्णय घेत, दोन्ही गटांच्या अर्जदारांना परवानगी नाकारल्याचे पत्र पाठवले आहे.