गौरव संतोष पाटील
बरसणाऱ्या आभाळमायेनं सध्या नद्या-नाले तुडुंब वाहतायत. त्यांचे प्रवाह डोंगरकड्यांवरून धबाधब्यांच्या रुपानं धरतीवर सौंदर्य उधळतायत. ते उसळतं सौंदर्य डोळ्यांमध्ये साठवण्यासाठी पर्यटकांची गर्दी उसळतेय.
महाराष्ट्रात गेले काही दिवस जोरदार पाऊस पडतोय. पाण्याचं वेगवान सौंदर्य पर्यटकांना भावतंच भावतं. उत्तर कोकणातील
पालघर जिल्ह्यात गेल्या काही दिवसापासून सातत्याने चांगला पाऊस सुरू आहे. त्यातही जव्हार भागात मुसळधार पाऊस सुरू आहे. त्यामुळे येथील नदी नाले ओसंडून वाहत आहेत. डोंगरातून वाहणारे झरे आणि धबधबे खळखळून वाहायला सुरुवात झाली आहे. जव्हारचं प्रसिद्ध पर्यटन स्थळ असलेलं कासटवाडी येथील झरे खळखळून व्हायला सुरुवात झाले आहेत.
जव्हार हे पालघरमधील मिनी महाबळेश्वर समजलं जातं. पावसाळा सुरू झाला की येथील वातावरण रमनीय बनते. जव्हार भागातील ही पर्यटन स्थळं पर्यटकांना भुरळ घालतात.हा अति दुर्गम भाग असला तरीही येथील दाभोसा आणि हिरडपाडा धबधबे मनमोहक असल्यानं पर्यटकांची गर्दी उसळते.
दाट धुकं आणि कोसळणारे धबधबे हे इथलं वैशिष्ट्य. नजर जाईल तिथे हिरवाईच हिरवाई दिसत असल्याने बाराही महीने वातावरण प्रसन्न असतं. दाभोसा आणि हिरड पाडा या धबधब्यात जेवढ्या वेगाने आणि उंचींवरून हे पाणी खाली पडतं, तितक्याच वेगाने त्याचे तुषार ५०-६० फुटांपर्यंत वर उडतात. चारही बाजुने डोंगरदऱ्यांनी वेढलेला परिसर, सर्वत्र जंगल आणि नीरव शांतता तसच धबधब्यातून पडणाऱ्या पाण्याचा खळखळाट. हे दृश्य खूप मनोहारी आणि विलोभनीय असल्याने पर्यटकांना भावतं.
सध्या पर्यटकांची गर्दी या दाभोसा या गावी वाढत चालली आहे. त्याचं कारण डोंगराच्या कुशीत वसलेले दाभोसा आणि हिरडपाडा हे धबधबे म्हणजे निसर्गाचं अतुलनीय असं कोसळतं सौंदर्य…डोळ्यांना सुखावणारं.
पालघर जिल्हयासह मुंबई तसच गुजरात ,नाशिक आणि सिलवासा मधून मोठ्या प्रमाणावर पर्यटक या धबधब्यावर मजा लुटन्यास येत आहेत . या धबधब्याच वैशिष्ठ म्हणजे हा धबधबा बाराही महीने सुरु असल्याने पावसाळा नसतानाही पर्यटकांना या पर्यटन स्थळाचा आनंद घेता येतो . मात्र वर्षाऋतुत धबधब्या बाजूला असलेली हिरवाई दिसत असल्याने या दोन्ही धबधब्याच सौंदर्य अधिक खुलून दिसते. या मुळे पर्यटक पावसाळ्यात मोठ्या प्रमाणावर येथे येताना पहायला मिळतात .
Subscribe
