शनिवारपासून सलग चार दिवस बँका बंद!

मुक्तपीठ टीम

जर तुमचे बँकसंबंधित काही महत्त्वाचे कामे असतील तर ते लवकरात लवकर उरकून घ्या. कारण शनिवारपासून सलग चार दिवस बँकेच्या कामकाजावर परिणाम होणार आहे. शनिवार आणि रविवार साप्ताहिक सुट्टीमुळे बँकेत कामकाज होणार नाही. त्याचबरोबर सोमवार आणि मंगळवारी बँक युनियनच्या संपामुळे कामकाजावर परिणाम होणार आहे. बँकांच्या खाजगीकरणाच्या विरोधात २८ मार्च आणि २९ मार्च रोजी बँक युनियनचा संप पुकारण्यात आल्याचे देशातील सर्वात मोठ्या स्टेट बँक ऑफ इंडियाने सांगितले.

बँकेचा संप कशासाठी?

• एसबीआयने जारी केलेल्या निवेदनात असे म्हटले आहे की, या काळात ग्राहकांना कोणत्याही प्रकारची अडचण येऊ नये यासाठी आम्ही सर्वतोपरी प्रयत्न करू.
• हा दोन दिवसीय संप ऑल इंडिया बँक एम्प्लॉईज असोसिएशन (AIBEA) सारख्या संघटनांनी जाहीर केला आहे.
• हा संप प्रामुख्याने नवीन कामगार कायद्याच्या विरोधात आहे. तसेच सरकार सरसकट सर्व सार्वजनिक क्षेत्रातील उद्योगांचे खासगीकरण करू पाहत आहे, त्या विरोधात आहे.
• सार्वजनिक आणि खासगी उद्योगांमधून कायमस्वरूपी रिकाम्या जागा न भरता सरसकट कंत्राटी पद्धतीचा अवलंब केला जात आहे, त्याला विरोध करण्यासाठी तसेच नवीन कर्मचाऱ्यांना जुनी निवृत्तिवेतन योजना लागू करावी, या मागणीसाठी हा संप पुकारण्यात आल्याचे सांगण्यात आले.

एप्रिलमध्ये बँक १५ दिवस बंद राहणार…

• एप्रिल महिना सुरू होणार आहे.
• एप्रिलमध्ये १५ दिवस बँका बंद राहतील.
• रिझर्व्ह बँक ऑफ इंडिया (RBI) च्या अधिकृत वेबसाइटवर दिलेल्या सुट्ट्यांच्या यादीनुसार, बँकिंग सुट्ट्या वेगवेगळ्या
• राज्यांमध्ये साजरे होणारे सण किंवा त्या राज्यांमधील विशेष प्रसंगी नोटिफिकेशनवर अवलंबून असतात.
  या सर्व सुट्ट्या सर्व राज्यांमध्ये लागू होणार नाहीत.