बच्चू कडूंचा नाव न घेता संताप, खिसा कापून किराणा वाटणारे महाठग! लक्ष्य राणा?

मुक्तपीठ टीम

अमरावतीत दिवाळीनिमित्त खासदार नवनीत राणा आणि आमदार रवी राणा घरोघरी मोफत किराणा वाटत आहे. यावरून प्रहार संघटनेचे आमदार बच्चू कडू यांनी राणा दाम्पत्याचं नाव न घेता टीका केली. येथे आधी खिशे कापणारे मग किराणा वाटणारे महाठग, महाअवलादी कमी आहेत का? असा खोचक प्रश्न करत राणा दाम्पत्यावर टीकास्त्र सोडलं.

काय म्हणाले बच्चू कडू?

अमरावती येथील संत ज्ञानेश्वर सांस्कृतिक भवनात शिंदे गटाचे आमदार व माजी राज्यमंत्री बच्चू कडू यांची रक्ततुला करण्यात आली होती.
या कार्यक्रमात आमदार बच्चू कडू यांनी राणा दाम्पत्यावर टीका केली.
काही ठिकाणी मतं मिळवायची असतील तर राजकीय नेत्याला रक्ताची आहुती द्यावी लागते.
मी रक्तदान करून निवडणुकीचा अर्ज भरला होता.
राजकीय मंडळींनी दान करण्याची प्रवृत्ती ठेवणं महत्त्वाचं आहे.
नाहीतर येथे आधी खिशे कापणारे मग किराणा वाटणारे महाठग, महाअवलादी कमी आहेत का?
त्यांनी नाव न घेता राणा दाम्पत्याला खोचक टोला लगावला आहे.

राणा दाम्पत्यावर अप्रत्यक्ष निशाणा!!

गोरगरीबांचे खिशे कापायचे, त्यांच्या खिशात हात घालायचा.
लोकशाहीचं पतन करायचं.
राजकारणाची ऐशी की तैशी करायची,असे नेते आपल्यात कमी नाहीत.
ज्या डॉक्टर बाबासाहेब आंबेडकरांनी मतदानाचा अधिकार दिला, त्या अधिकाराचं पतन करत आम्ही पुन्हा किराण्यावर निवडून येतो, असं सांगणाऱ्या महाठगाला सुद्धा आपण पाहतोय.