अमरावतीत लव्ह जिहाद की राजकीय जिहाद? तरुणीचा खासदार नवनीत राणांवर बदनामीचा आरोप!!

मुक्तपीठ टीम

गेले काही दिवस अमरावतीत लव्ह जिहाद झाले असा आरोप करत खासदार नवनीत राणा आणि भाजपाचे प्रवक्ते शिवराय कुलकर्णी यांनी महाराष्ट्रात खळबळ माजवली. खासदार राणा यांनी तर पोलीस ठाण्यात धाव घेत पोलिसांवरही आरडाओरडा केला. त्यांचा मोबाइल फोनकॉल रेकॉर्ड केल्याचा आरोप केला. पण आता ज्या तरुणीच्या कथित बेपत्ता प्रकरणाच्या आधारे हे राजकारण सुरु होते, त्या तरुणीने पुढे येत आपण घरातील भांडणामुळे घर सोडून गेलो होतो, असे स्पष्ट केले आहे. तसेच नवनीत राणांवर आपली नाहक बदनामी केल्याचा आरोप केला आहे. आधी पोलिसांवर आक्रस्ताळी हल्ला आणि आता तरुणीचा बदनामीचा आरोप, यामुळे खासदार राणा आणि भाजपा प्रवक्ते शिवराय कुलकर्णी अडचणीत आले आहेत.

अमरावती येथे कथित लव्ह जिहाद प्रकरणी बेपत्ता असलेल्या तरूणीचा शोध लागला आहे. बेपत्ता झालेली ही तरुणी अखेर चार दिवसांनंतर अमरावतीत पोहोचली. या प्रकरणाला आता वेगळंच वळण मिळाले आहे. गेल्या काही दिवसांपासून ही १९ वर्षीय तरूणी बेपत्ता होती. मुलगी बेपत्ता झाल्याचे कळताच कुटुंबीयांनी तात्काळ पोलीस स्टेशन गाठले होते. यावर भाजप खासदार नवनीत राणा यांनी लव्ह जिहादचा आरोप तसेच मुलीला डांबून ठेवल्याचा आरोप केला होता. मात्र, त्या मुलीने आता राणांवरच तिची बदनामी केल्याचा आरोप केला.

अमरावतीतील राजकीय जिहाद?

• अमरावतीतील एक तरुणी घरातून बेपत्ता झाल्याने तिच्या कुटुंबाने पोलीस तक्रार केली होती.
• खासदार नवनीत राणा आणि भाजपा प्रवक्ते शिवराय कुलकर्णी यांनी हे लव्ह जिहादचे प्रकरण असल्याचा आरोप केल्यामुळे अमरावतीत खळबळ माजली होती.
• यामुळे अमरावतीत तणावाचे वातावरण निर्माण झाले होते.
• त्यातच नवनीत राणा यांनी पोलीस उपायुक्तांवर कॉल रेकॉर्डिंगचा आरोप करत आक्रस्ताळा हल्ला चढवल्याचा व्हिडीओ चांगलाच व्हायरल झाला.
• राणांचा आरडाओरडा आणि पोलीस अधिकाऱ्यांचं भीतीग्रस्त वागणं यामुळे राजकारण तापलं होतं.
• पोलीस स्टेशनमध्ये चांगलाच वाद झाला होता.
• त्यातच पोलीस कुटुंबीय राणांविरोधात रस्त्यावरही आले.
• त्यातच बुधवारी ७ सप्टेंबर रोजी सातारा पोलिसांनी बेपत्‍ता झालेल्‍या युवतीचा शोध लावला.
• साताऱ्यावरून अमरावती पोलीस त्या तरुणीला घेऊन आले.
• तसेच राजापेठ पोलीस स्टेशनमध्ये तिचा जबाब नोंदवण्यात आला.
• तरुणीने आपण घरातील भांडणांमुळे घर सोडल्याचा दावा केला.
• तसेच तिने खासदार नवनीत राणांवर लव्ह जिहादचा आरोप करत तिची बदनामी केल्याचा आरोप केला.
• तरुणीच्या आरोपानंतर या प्रकरणाला आता नवीन वळण मिळाले आहे.

आपला जबाब नोंदवत या तरूणीने म्हटले की, ‘लव्ह जिहाद असा काही प्रकार नाही आहे, मी स्वतःहून रागाच्या भरात घरातून निघून गेले होते. खासदार नवनीत राणा यांनी माझी बदनामी केली असल्याचा गंभीर आरोपही या तरुणीने यावेळी केला.” पोलिसांनी तरुणीचा जबाब घेऊन तिला आई वडिलांच्या स्वाधीन केले आहे.