फडणवीसांवरील अन्याय! भाजपात ब्राह्मणांच्या खच्चीकरणाचा आरोप!!

मुक्तपीठ टीम

एकनाथ शिंदेंसह ४० आमदारांच्या बंडानंतर महाविकास आघाडीचे सरकारल कोसळलं. त्यानंतर भाजपा नेते देवेंद्र फडणवीस पुन्हा मुख्यमंत्री आणि एकनाथ शिंदे उपमुख्यमंत्री होणार, असं सर्वांना वाटत होतं. मात्र,ऐनवेळी स्वतः देवेंद्र फडणवीस यांनीच पत्रकार परिषद घेत एकनाथ शिंदे मुख्यमंत्री असतील आणि मी सरकारलाबाहेरून पाठिंबा देणार,असं जाहीर केलं. मात्र, भाजपाच्या केंद्रीय नेतृत्वाच्या आदेशावरून फडणवीसांना उपमुख्यमंत्रीपदाची शपथ घ्यावी लागली. त्यामुळे भाजपाच्या केंद्रीय नेतृत्वाकडून फडणवीसांचं खच्चीकरण केल्याचा गंभीर आरोप अखिल भारतीय ब्राह्मण महासंघाने केला आहे.

भाजपात खरंच ब्राह्मणांचं खच्चीकरण होतंय?

• ब्राह्मण महासंघाचे अध्यक्ष डॉ. गोविंद कुलकर्णी यांनी याबाबत निवेदन जारी करत आपली भूमिका स्पष्ट केली.
• भाजपामध्ये ब्राह्मणांचे खच्चीकरण होत आहे.
• पंतप्रधान पदाच्या स्पर्धामधून हटवण्यासाठी नितीन गडकरी यांचं चारित्र्य हनन करून त्यांचं खच्चीकरण करण्यात आलं.
• त्यानंतर गेल्या तीन वर्षांपासून भाजपातील तथाकथित नेते मंडळी देवेंद्र फडणवीस यांची घोडदौड रोखण्यासाठी बहुमतापेक्षा अधिक संख्येने युतीचे आमदार निवडून आणल्यानंतरही सरकार न बनविण्याचं षडयंत्र आखण्यात आलं.
• योजनाबद्ध पद्धतीने देवेंद्र फडणवीस यांना सत्तेपासून लांब ठेवण्यात आले.

भाजपामध्ये ब्राह्मण नेतृत्वाचं खच्चीकरण करण्याचे एक सुनियोजित कारस्थान!!

• आत्ता फडणवीस यांनी आपल्या राजकीय कौशल्यातून पुन्हा भाजपाला सत्तेच्या दारापर्यंत पोहचविले.
• त्यानंतर एकनाथ शिंदे यांना मुख्यमंत्री बनविण्याचे निर्देशन दिले.
• देवेंद्र फडणवीस यांनी मोठ्या मनाने मुख्यमंत्रीपदाचा त्याग करून कार्यकर्ता म्हणून काम करण्याचे ठरविले.
• त्यानंतर भाजपातील वरिष्ठ नेतृत्वाने बळजबरीने उपमुख्यमंत्रीपद स्वीकारण्यासाठी आग्रह धरला.
• यातून देवेंद्र फडणवीस यांचं खच्चीकरण करण्यात आलं.
• भाजपामध्ये एकानंतर एक ब्राह्मण नेतृत्वाचं खच्चीकरण करण्याचे एक सुनियोजित कारस्थान चाललं आहे.
• या घटनेचा अखिल भारतीय ब्राह्मण महासंघ तीव्र शब्दात निषेध करीत आहे.