सामाजिक परिवर्तनासाठी एका हाती संघर्ष आणि एका हाती रचना…. अभिनेत्री चिन्मयी सुमीत

मुक्तपीठ टीम

सामाजिक परिवर्तनासाठी एका हाती संघर्ष आणि एका हाती रचना या दोन्ही गोष्टींची आज नितांत गरज आहे असे प्रतिपादन प्रसिद्ध अभिनेत्री चिन्मयी सुमीत यांनी आज महाड येथील डॉ.बाबासाहेब आंबेडकर महाविद्यालयात राष्ट्र सेवा दल,मुंबईने आयोजित केलेल्या कार्यक्रमात केले.

२१ जुलैच्या महापुरात महाड येथील डॉ. बाबासाहेब आंबेडकर कॉलेज ऑफ आर्ट्स, कॉमर्स अँड सायन्सचे खूप नुकसान झाले होते. कॉलेजातील रसायनशास्त्र विभागातील प्रयोगशाळेस राष्ट्र सेवा दल मुंबईच्या वतीने साहित्य प्रदान करण्याचा कार्यक्रम चिन्मयी सुमीत यांच्या हस्ते करण्यात आला. या कार्यक्रमात त्या बोलत होत्या. या प्रसंगी विचारमंचावर मुंबईतील व्ही.जे. टी.आय.चे निवृत्त असोशियट डीन आणि सानेगुरूजी राष्ट्रीय स्मारकाचे अध्यक्ष डॉ.संजय मंगला गोपाळ, कॉलेजचे प्राचार्य डॉ.धनाजी गुरव, राष्ट्र सेवा दल मुंबईचे कार्याध्यक्ष शरद कदम, सानेगुरूजी राष्ट्रीय स्मारकाच्या विश्वस्त सिरत सातपुते, प्रा.दीपक क्षीरसागर उपस्थित होते.

आज मी या महाविद्यालयात आले आणि माझे मन मराठवाड्यातील औरंगाबाद मधील पी. ई.सोसायटीच्या डॉ.आंबेडकर महाविद्यालयाच्या आठवणीत गेले. माझी आई डॉ.आंबेडकर कॉलेज मध्ये मानसशास्त्र विभागप्रमुख होती. याच मातीत माझ्यावर चांगले संस्कार झाले. माझं बालपण समृध्द झाले. आपल्या भावना आणि विचार सतत एकत्रितपणे जपण्याचे वातावरण मला तिथे मिळाले त्याबद्द्ल कृतज्ञता आणि अभिमान वाटतो. माझी आई नामांतराच्या आंदोलनात तुरुंगात गेलेली आहे. या कार्यक्रमाला येण्यापूर्वी मी चवदार तळ्याशी जावून नतमस्तक झाले. मी जे समतेचे विचार मानते ते विचार आचरणात यायला हवेत अशी माझी धारणा आहे. आजकालच्या वातावरणात खूप अस्वस्थता दाटून येते मात्र राष्ट्र सेवा दला सारख्या संघटना, संस्था समाजासाठी असं काही काम करताना पाहिले की हेच वातावरण खूपच आश्वासक वाटायला लागते असेही चिन्मयी सुमीत यांनी सांगितले.

आपत्ती मध्ये मदत करणे हे जसे गरजेचे आहे तसेच ती आपत्ती येवू नये यासाठी ही प्रयत्न करायला पाहिजे. सेवा दल तशा पद्धतीने काम करते असे प्रतिपादन व्हि.जे. टी.आय.चे निवृत्त असोशियट डीन आणि सानेगुरूजी राष्ट्रीय स्मारकाचे अध्यक्ष डॉ. संजय मंगला गोपाळ यांनी केले.

रेड क्रॉस सारखी संस्था रक्त सांडल्यावर मलमपट्टी लावण्याचे काम करते. राष्ट्र सेवा दल त्याच्या एक पाऊल पुढे जावून काम करते. हे असे का होतेय या बद्दल प्रश्न विचारते आणि पुन्हा असे होवू नये म्हणून धोरण आखून प्रयत्न करते अशा शब्दांत राष्ट्र सेवा दलाच्या कार्याचा गौरव डॉ. संजय मंगला गोपाळ यांनी केला.

अवकाळी पाऊस, पूर, उष्णतेचे वाढते प्रमाण आदी पर्यावरणीय प्रश्नाचा धांडोळा घेण्याचे काम तुम्हा विद्यार्थ्यांचे आहे. कुणी तरी परिस्थिती बदलेल असा विचार न करता काय करणे आवश्यक आहे या प्रेरणा निर्माण होवून कचरा, प्लास्टिक यांचा विचार होवून पर्यावरण रक्षणाचा प्रयत्न करून असे प्रसंग पुन्हा येणार नाहीत अशी जीवनशैली जोपासण्याचे आवाहन संजय मंगला गोपाळ यांनी यावेळी उपस्थितांना केले.

कॉलेजचे प्राचार्य डॉ.धनाजी गुरव यांनी राष्ट्र सेवा दलाने केलेल्या मदती बद्दल आभार व्यक्त केले. प्रा.दीपक क्षीरसागर यांनी कार्यक्रमाचे सूत्र संचलन केले. कार्यक्रमाचं प्रास्ताविक राष्ट्र सेवा दल मुंबईचे कार्याध्यक्ष शरद कदम यांनी केले. त्यांनी राष्ट्र सेवा दलाने आपत्तीग्रस्त कोकणात केलेल्या मदतीचा आढावा घेतला. ग्रामिण भागातील विद्यार्थ्यांची शैक्षणिक गैरसोय होऊ नये म्हणून राष्ट्र सेवा दल,मुंबई मदत घेऊन आलं आहे. या कामात स्थानिकांनीही योगदान द्यावं असं आवाहनही शरद कदम यांनी केलं. आपत्तीच्या काळात मदतीला सरसावलेलं राष्ट्र सेवा दल व साने गुरुजी राष्ट्रीय स्मारक महाडकरांच्या सुखदुःखात कायम सोबत राहिल असं सोबतीचं आश्वासन राष्ट्र सेवा दलाच्या पूर्णवेळ कार्यकर्त्या व साने गुरुजी राष्ट्रीय स्मारकाच्या विश्वस्त सिरत सातपुते यांनी याप्रसंगी महाडकरांना दिले.

या कार्यक्रमा नंतर महाड नगर परिषदेच्या शाळा क्रमांक १ आणि शाळा क्रमांक २ मध्ये संगणक, वाचनालयासाठी कपाटे आणि इतर शैक्षणिक साहित्य अभिनेत्री चिन्मयी सुमीत आणि डॉ.संजय मंगला गोपाळ यांच्या हस्ते प्रदान करण्यात आली. यावेळी गाणी, गोष्टी आणि गप्पांमधून मुलांशी संवाद साधण्यात आला. करोनाकाळात बंद असलेली आणि पूराच्या पाण्याचे सावट असलेली शाळा यानिमित्ताने मुलांच्या किलबिलाटाने आणि गाण्यांच्या आवाजाने गजबजून गेली.