भाजपामुळेच हुकलं होतं, एकनाथ शिंदेंचं निष्ठावान राहूनही मुख्यमंत्री बनणं?

मुक्तपीठ टीम

नुकतेच जामिनावर सुटलेले शिवसेना खासदार संजय राऊत यांनी शिवसेना-भाजपा युतीवर मोठं वक्तव्य केलं आहे. शिवसेनेचा भाजपाशी वैयक्तिक वाद नाही. शिवसेना आणि भाजपचा डीएनए एकच आहे. २०१९ मध्ये आम्ही भाजपसोबत युती केली, तेव्हा आम्हालाच एकनाथ शिंदे यांना राज्याचे मुख्यमंत्री करायचे होते, पण त्यावेळी भाजपला ते मान्य नव्हते. उद्धव ठाकरेंना मुख्यमंत्री व्हायचे नव्हते, पण भाजपाने जेव्हा युतीचा आदर केला नाही तेव्हा परिस्थितीनुसार उद्धव ठाकरे यांना तसे करावे लागले, असं संजय राऊत म्हणाले.

काय म्हणाले संजय राऊत?

राऊत म्हणाले की, “२०१९ च्या महाराष्ट्र निवडणुकीपूर्वी शिवसेनेची भाजपासोबत युती होती, ५०.५० च्या आधारे सत्ता वाटून घेतली जाईल असा करार झाला होता. आम्हाला हिंदुत्वाला पुढे न्यायचे होते, जे दोन्ही पक्षांची एक मूळ विचारधारा देखील आहे.
आम्ही भाजपसोबत युती केली तेव्हा उद्धव ठाकरेंना मुख्यमंत्री व्हायचे नव्हते.
पक्षाने एकनाथ शिंदे यांना मुख्यमंत्री करण्याचा निर्णय घेतला होता.
त्यावेळी भाजपाने दिलेले आश्वासन पूर्ण केले असते तर. , एकनाथ शिंदे यांना मुख्यमंत्री केले असते.
त्यावेळी शिंदे उद्धव ठाकरे यांच्या नेतृत्वाखालील शिवसेनेत निष्ठेची शपथ घेत होते.
पण भाजपाने शिवसेनेचे नाव, चिन्ह सर्वकाही तोडून हे केले. भाजपला काय हवे होते?

मग उद्धव यांना मुख्यमंत्री का केले?

उद्धव ठाकरे वेगवेगळ्या परिस्थितीत मुख्यमंत्री झाले.
शिवसेनेने शरद पवार यांच्या राष्ट्रवादी काँग्रेस आणि काँग्रेससोबत आघाडी केली होती, त्यामुळे त्यावेळी परिस्थिती अशी होती की, उद्धव ठाकरे यांना २०१९ मध्ये महाराष्ट्रात सरकार स्थापन करावे लागले.