मुक्तपीठ टीम
माजी वनमंत्री संजय राठोड यांच्या राजीनाम्याचं कारण ठरलेल्या पूजा चव्हाणच्या पोस्टमार्टम रिपोर्टकडे सर्वांचे लक्ष लागले होते. पूजाच्या शवविच्छेदनाचा अहवाल आता पुण्यातील वानवडी पोलिसांना मिळाला आहे. तिचा मृत्यू कशामुळे झाला त्याची वैद्यकीय कारणं या अहवालामुळे स्पष्ट होण्याची शक्यता आहे.
पूजा चव्हाणचा ७ पेब्रुवारीला वानवडीत मृत्यू झाला होता. तिने पहिल्या मजल्यावरून उडी मारून आत्महत्या केली, असे सांगितले जाते. तिच्या आत्महत्येनंतर सोशल मीडियावर काही ऑडिओ क्लिप्स व्हायरल झाल्या होत्या. त्यातील आवाज संजय राठोड यांचा असल्याचं समोर आलं होतं. त्यानंतर भाजपानं हे प्रकरण उचलून धरत संजय राठोड यांनी वनमंत्री पदाचा राजीनामा द्यावा यासाठी राज्य सरकारवर दवाब आणला. त्यामुळे अखेर राठोडांना राजीनामा द्यावा लागला.
मणका आणि जबड्याला जबर दुखापत
पूजाने आत्महत्या केली, ती अपघाती पडली की घातपात झाला, हे अजूनही स्पष्ट झालेले नाही. दरम्यान, मृत्यूचे वैद्यकीय कारण सांगणारा सविस्तर शवविच्छेदन अहवाल वानवडी पोलिसांना मिळाला आहे. ज्यामध्ये तिच्या मणक्‍याला आणि डोक्‍याला जबर दुखापत झाल्यामुळेच मृत्यु झाल्याचे कारण समोर येत आहे.
पूजा चव्हाणच्या आत्महत्येनंतर झालेल्या प्राथमिक तपासातूनही जबर दुखापत हेच कारण पुढं आलं होतं. आता शवविच्छेदनाच्या सविस्तर अहवालातून त्यावर शिक्कामोर्तब करण्यात आलं आहे. अर्थात, वानवडी पोलिसांनी याबद्दल आताच काहीही सांगण्यास नकार दिला आहे. लवकरच आम्ही माध्यमांना सविस्तर माहिती देऊ, असं पोलिसांनी म्हटलं आहे.
Subscribe
