महागाईनं गॅसवर! सीएनजी पाच रुपयांनी तर पीएनजी साडेचार रुपयांनी भडकला!

मुक्तपीठ टीम

राज्यात एकीकडे पेट्रोल आणि डिझेलच्या वाढत्या किंमती गगनाला भिडलेले असताना आता सीनएनजी आणि पीनएजीच्या दरात पुन्हा एकदा वाढ करण्यात आली आहे. मुंबई आणि परिसरात सीएनजी आणि पीएनजीच्या दरात पुन्हा एकदा वाढ करण्यात आली असून सीएनजी प्रति किलो ५ रुपयांनी तर पीएनजी साडेचार रुपयांनी महागले आहे. महानगर गॅस लिमिटेच्या या निर्णयामुळे सामान्य नागरिकांच्या खिशाला कात्री बसत आहे.

इंधन दरवाढीने नागरीक हैराण…

• महानगर गॅस लिमिटेडने एक निवेदन जारी करुन ही दरवाढ जाहीर केली आहे.
• या नव्या दरवाढीमुळे सीएनजीचा दर किलोमागे ७२ रुपये झाला आहे तर घरगुती पाईप अर्थात पीएनजीचा दर आता किलोमागे ४५.५० रुपये इतका झाला आहे.
• त्या आधी ६ एप्रिल रोजी मुंबईत सीएनजीच्या किमतीत ७ रुपयांची तर पीएनजीच्या किमतीत ५ रुपयांची वाढ करण्यात आली होती.
• १ एप्रिलला राज्य सरकारनं नैसर्गिक वायूवरील व्हॅटमध्ये कपात केली होती.
• मात्र सलग दोन वेळा झालेल्या दरवाढीनं सीएनजी, पीएनजीचे दर पुन्हा एकदा मूळ किमतीवर पोहोचले आहेत.
• त्यामुळे राज्य सरकारनं केलेल्या व्हॅट कपातीचा ग्राहकांना फायदा झालाच नसल्याचं स्पष्ट झालं आहे.

टॅक्सी, रिक्षा भाडेवाढीची मागणी तर ओला, उबरही दरवाढीच्या तयारीत…

• सीएनजीमध्ये झालेल्या दरवाढीचा मोठा फटका टॅक्सी आणि रिक्षाचालकांना बसत आहे.
• परिणामी टॅक्सी आणि रिक्षाच्या भाड्यात दोन ते पाच रुपयांनी वाढ करण्याची मागणी संघटनेने केली आहे.
• तर सीएनजीमध्ये झालेल्या दरवाढीनंतर ओला आणि उबरसारख्या मोबाईल ॲप आधारित टॅक्सी कंपन्यांनीही भाड्यामध्ये वाढ करण्याची तयारी केली आहे.
• सीएनजीच्या दरात झालेली वाढ पाहता, प्रवाशांसाठी कॅबमधील एसी चालू करण्याची आमची अजिबात तयारी नाही.
• वाढलेल्या किमतीमुळे आमचं बजेट कोलमडलं आहे.