काळजी घ्या! पुण्यातील एका कंपनीतील १६१ कामगार पॉझिटिव्ह! गावांमध्येही भीती!

मुक्तपीठ टीम

महाराष्ट्रात कोरोनाची गंभीर परिस्थिती निर्माण झाली आहे. पुणे तर कोरोनाच्या हिटलिस्टवरचं असल्यासारखे वाटते, पुण्यात दररोज १० हजारांच्या आसपास कोरोनाची प्रकरण नोंदवली जात आहेत. त्यातचं पुणेकरांची चिंता वाढणारी आणखी एक माहिती समोर आली आहे. पुण्यातील बौर गावाच्या हद्दीत असलेल्या एका कंपनीमधील सुमारे १६१ कामगारांची कोरोना चाचणी पॉझिटिव्ह आली आहे. यामुळे या परिसरातील लोकांमध्ये भीतीचे वातावरण निर्माण झालं आहे.

कोरोनाच्या पार्श्वभूमीवर खबरदारी म्हणून कंपनीतील ३७५ कामगारांची सोमवारपासून खासगी लॅबमध्ये कोरोनाची चाचणी करण्यात येत होती. शनिवारपर्यंत यामध्ये १६१ कामगारांना कोरोनाची झाल्याचे समोर आले आहे. या कंपनीमध्ये काम करणारे कामगार हे मावळ तालुक्यातील पुणे-मुंबई एक्स्प्रेस वेलगतच्या गावांचे रहिवाशी असल्याने संबंधित गावांतही भितीचे वातावरण निर्माण झाले आहे.

मावळ तालुका आरोग्य अधिकारी डॉ. चंद्रकांत लोहारे यांच्या मार्गदर्शनाखाली डॉ. राजेंद्र मोहिते, डॉ. संदीप मुंडे, आरोग्यसेवक केतन जाधव, विना धुरंधर, लता वाळुंजकर आदींच्या पथकाने १६१ कामगारांची संपूर्ण वैद्यकीय तपासणी केली आहे. सद्यस्थितीत रुग्णांची स्थिती चांगली असल्याने त्यांना क्वारंटाईन करण्यात आले आहे. उर्वरित कामगारांचे रिपोर्ट काय येतात, याकडे सर्वांचे लक्ष लागून आहेत. दरम्यान, परिसरातील गावकऱ्यांनी घाबरून न जाता काळजी घ्यावी आणि सरकारच्या नियमांचे पालन करावे, असे आवाहन आरोग्य विभागाकडून करण्यात आले आहे.