पालघरसह सहा जिल्ह्यांमधील पोटनिवडणुका जाहीर

मुक्तपीठ टीम

ओबीसी आरक्षणाचा प्रश्न मार्गी लागेपर्यंत स्थानिक निवडणुका नकोत अशी भूमिका दाखवण्यासाठी का होईना सर्वच राजकीय पक्षांनी घेतली होती. मात्र, आता सर्वोच्च न्यायालयाच्या दट्ट्यानंतर निवडणुकांचा कार्यक्रम जाहीर झाला आहे. त्यानुसार आता सहा जिल्ह्यांमधील जिल्हा परिषदेच्या आणि पंचायत समितींच्या रिक्त जागांसाठी पोटनिवडणुकांची राज्य निवडणूक आयोगानं घोषणा केलीय. पाच ऑक्टोबरला मतदान तर सहा ऑक्टोबरला मतमोजणी होणार आहे. ओबीसी आरक्षणाविना निवडणुका होणार असल्याने या निवडणुकीत वेगळा रंग मिसळला जाणार आहे.

किती जागांसाठी निवडणूक

• जिल्हा परिषदेच्या ८५ जागा
• पंचायत समितीच्या १४४ जागा

कुठे आणि कधी निवडणुका

• पालघर, धुळे, नंदुरबार, अकोला, वाशीम व नागपूर जिल्हा परिषदा व पंचायत समित्यांच्या पोटनिवडणुकांचा स्थगित केलेला निवडणूक कार्यक्रम आता जाहीर केला आहे.
• तो पूर्ण करण्याच्या दृष्टीने ५ ऑक्टोबर २०२१ रोजी मतदान घेण्यात येणार आहे.
• सर्व ठिकाणी ६ ऑक्टोबर २०२१ रोजी मतमोजणी होईल.

राज्य निवडणूक आयुक्त यू. पी. एस. मदान यांनी निवडणुकीची घोषणा

• धुळे, नंदुरबार, अकोला, वाशीम आणि नागपूर या ५ जिल्हा परिषदा आणि त्यांतर्गतच्या पंचायत समित्यांमधील रिक्तपदांच्या पोटनिवडणुकांसाठी १९ जुलै रोजी मतदान होणार होते.
• सर्वोच्च न्यायालयाचे ६ जुलै २०२१ रोजीचे आदेश आणि राज्य शासनाने कोरोनामुळे पोटनिवडणुका स्थगित करण्याबाबत केलेली विनंती लक्षात घेऊन राज्य निवडणूक आयोगाने या निवडणुका ९ जुलै २०२१ रोजी आहे त्या टप्प्यावर स्थगित केल्या होत्या.
• या प्रकरणी ९ सप्टेंबर २०२१ रोजी झालेल्या सुनावणीत मात्र सर्वोच्च न्यायालयाने राज्य शासनाचे ११ ऑगस्ट 2021 रोजीचे कोरोनासंदर्भातील निर्बंध पोटनिवडणुकांसाठी लागू होत नसल्याचा निकाल दिला आहे.
• तसेच सर्वोच्च न्यायालयाने पोटनिवडणुकांचा कार्यक्रम पुढे चालू ठेवण्याबाबत राज्य निवडणूक आयोगाने तात्काळ निर्णय घेण्याबाबतही आदेश दिले आहेत.

सहा जिल्ह्यांमधील निवडणूक कार्यक्रम

• १५ सप्टेंबर ते २० सप्टेंबर निवडणूक अर्ज
• २१ सप्टेंबर अर्जाची छाननी होणार
• २९ सप्टेंबर रोजी अर्ज मागे घेता येणार
• ५ ऑक्टोबरला मतदान
• ६ ऑक्टोबरला निकाल