शरद पवारांनी सांगितलेला विजयाचा फॉर्म्युला संभाजी छत्रपतींना पुन्हा राज्यसभेत पोहचवणार?

मुक्तपीठ टीम

छत्रपती संभाजीराजेंनी येत्या राज्यसभा निवडणुकीत अपक्ष लढवण्याचं जाहीर केलं आहे. यासाठी संभाजीराजे यांना अर्ज दखल करण्यासाठी १० अनुमोदक आमदारांची व निवडून येण्यासाठी एकूण ४२ आमदारांच्या मतांची आवश्यकता आहे. या पार्श्वभूमीवर छत्रपती संभाजीराजे यांच्या अपक्ष उमेदवारीला राष्ट्रवादी काँग्रेसकडून पाठिंबा असल्याचे शरद पवार यांनी जाहीर केले आहे.

त्यांनी राष्ट्रवादीची अतिरिक्त मते देऊ केली असली तरी अद्याप शिवसेनेने अधिकृत पाठिंबा जाहीर केलेला नाही. मुख्यमंत्री उद्धव ठाकरेंशी असलेल्या संभाजी राजेंच्या स्नेहामुळे तो मिळवणे शक्य आहे. पण तो मिळवण्यासाठी शिवसेनाप्रवेशाची अट घातली गेल्याची चर्चा आहे. तो मिळाल्यानंतर खरं आव्हान आघाडीला पाठिंबा देणारे छोटे पक्ष आणि अपक्षांचा पाठिंबा मिळवण्याचे आहे. भाजपा समर्थक अपक्ष महेश बालदी यांनी संभाजी राजे छत्रपतींच्या उमेदवारी अर्जावर अनुमोदक म्हणून सही केली आहे. भाजपानेही तिसरा उमेदवार न देण्याची भूमिका घेतली तर बिनविरोध निवड शक्य आहे. सध्या तरी अपक्ष म्हणून संभाजी छत्रपतींची निवड तेवढी सोपी नाही.

काय म्हणाले शरद पवार?

• राज्यसभेचा निकाल प्रत्येक पक्षाची किती ताकद यावर अवलंबून आहे.
• आम्ही महाविकास आघाडीतील इतर पक्षांशी अद्याप चर्चा केलेली नाही.
• मात्र, राष्ट्रवादी काँग्रेस पक्षापुरतं सिमीत मी सांगतो, राज्यसभेत आमचा एक सदस्य निवडून यायला कोणतीही अडचण नाही.
• त्याची मतांची गरज भागून राष्ट्रवादीकडे १०-१२ मतं जादा शिल्लक राहतात.

सहाव्या जागेसाठी आम्ही संभाजीराजेंना देऊ…

• शिवसेनेकडे पण सरप्लस मतं आहेत.
• त्यामुळे त्यांनाही काही अडचण नाही.
• राहता राहिला प्रश्न आमचा सहकारी पक्ष काँग्रेस तर त्यांच्याकडे देखील संख्याबळ आहे.
• कमी पडलं तर आम्ही मदत करू.
• आघाडीतील प्रत्येक पक्षाच्या संख्याबळाच्या जोरावर प्रत्येकी एक-एक जागा हमखास निवडून येऊ शकतात.
• याव्यतिरिक्त शिल्लक राहणारी मते सहाव्या जागेसाठी आम्ही संभाजीराजेंना देऊ.