मुंबईच्या विकासासाठी जमिनीखाली पराक्रम गाजवणार ‘मावळा’

मुक्तपीठ टीम

मुंबईच्या सागरी किनारा मार्गासाठी दोन महाबोगदे खणणारे ‘मावळा’ टीबीएम यंत्र मुख्यमंत्री उद्धव ठाकरेंच्या हस्ते सोमवारी कार्यान्वित करण्यात आले. या महायंत्राच्या महाक्षमतेचे मुख्यमंत्र्यांनी मोकळेपणाने कौतुक केले. मुंबईच्या विकासासाठी जमिनीखाली महापराक्रम गाजवणारे हे महायंत्र मावळा आहे तरी कसे ते समजून घेणं महत्वाचं आहे.

बोगदा खणणारे मावळा मशीन म्हणजेच टीबीएम हे या प्रकल्पातील महत्त्वाचे साधन आहे. त्याची माहिती देणारे प्रमुख मुद्दे पुढीलप्रमाणे आहेत:

या टीबीएम मशीनला ‘मावळा’ असे नाव देण्यात आलं आहे.
हे अजस्त्र यंत्र 12 मीटर 19 इंच व्यासाचे आहे.
देशात आतापर्यंत वापरण्यात येणारे सर्वात मोठ्या व्यासाचे टीबीएम मशीन आहे.
तयार होणाऱ्या 11 मीटर बोगद्यात सर्व सुरक्षेची व्यवस्था असेल.
अरबी समुद्राखालील तब्बल 175 एकर जमिनीवर भराव टाकण्यात आला आहे.
अजून 102 एकर समुद्राखालील जमिनीवर भराव टाकण्यात येणार आहे.
या मार्गावर समुद्राखालून 400 मीटरचे बोगदे असतील.
हे बोगदे खोदण्याचे काम मावळा करणार आहे

महाबोगदे खणण्याची सुरुवात प्रियदर्शनी पार्क येथून करण्यात आली. हे बोगदे प्रियदर्शनी पार्क ते नेताजी सुभाष मार्गालगत (मरिन ड्राईव्ह) असणाऱ्या ‘छोटा चौपाटी’पर्यंत असणार असून ते ‘मलबार हिल’ च्या खालून जाणार आहेत. दोन्ही बोगदे हे जमिनीखाली १० मीटर ते ७० मीटर एवढ्या खोलीवर असणार आहेत. दोन्ही बोगद्यांची लांबी ही प्रत्येकी २.०७ किलोमीटर इतकी असणार आहे. भारतातील महानगरांमधील रस्ते बोगद्यांमध्ये अशा प्रकारची यंत्रणा भारतात पहिल्यांदाच बसविण्यात येणार आहे. सागरी किनारा मार्गाच्या एकूण कामापैकी २० टक्के काम आतापर्यंत पूर्ण झाले आहे. शामलदास गांधी मार्गावरील उड्डाणपूल (Princess street flyover) ते वरळी या दरम्यान १०.५८ किमी लांबीचा हा ‘सागरी किनारा मार्ग’ असेल.

पाहा व्हिडीओ: